New Delhi, Naiwieng 24: Ka kam cooperative ka dei kaba la paw namar ka jingkyntiew ia ki briew kiba kwah ban kiew ha kaioh ka kot bad ruh namar ka jingwanrah ia ki hapoh ki kam ka ioh ka kot.
Ka kam cooperative ka don shibun ki lad kum ka bor jong ka jingkylla ban kyntiew ia kito kiba duna pisa lane kiba don tang khyndiat ki jingkynshew. Ka India ka dang trei na ka bynta kane.
Watla ka ri jong ngi ka don ka nongrim kaba khlain jong ki cooperative, ka rukom ha kaba ka kam iatreilang ka la kylla sha ka lad na ka bynta ka jingkyntiew ia ka ioh ka kot shuwa ban ioh ka jinglaitluid jong ka ri la khyllie im biang da ka bor kaba thymmai ha ka samoi jong u Myntri Rangbah Duh, Narendra Modi.
Ha u snem 2021, hapoh ka jingialam jong u Myntri Rangbah Duh, Narendra Modi, ka Sorkar ka la shim ia ka rai kaba heh ban plié lut ia ki lad kiba la khang na ka bynta ka kam cooperative da kaba sdang ia ka tnad kaba kyrpang na ka bynta ka jingiatreilang ha ka ri.
Ki sienjam ba la shim ban pynkhlain ia kane ka kam ka la ai ia ka India ha kine ki lai snem ia ka jingkhreh ban paw kum ka ‘Vishwamitra’ ha ka kam cooperative ruh.
Namar kane, ki kam cooperative mynta ki don ha ka khep jong u mawmer ba kyrpang. Ka India ka la khreh ban pdiang ia ka International Cooperative Alliance (ICA) General Assembly bad Global Cooperative Conference ha Delhi naduh ka 25 haduh 30 tarik u Naiwieng, 2024.
Ha ka sien kaba nyngkong ha ka histori kaba 130 snem jong ka ICA, ka India kan pynlong ia kane ka jingialang. Kane ka prokram ka long kaba kongsan namar kan long ka dak jong ka jingwan jong ka United Nations International Year of Cooperatives 2025.
Ka jingpynlongia ka ICA General Assembly and Global Conference ha India ka dei ka dak jong ka jingithuh ha kylleng ka pyrthei ia ka jinglong nongialam ka ri ha ki kam cooperative.
Naduh ba la wan ka Sorkar BJP hapoh ka jingialam jong u Myntri Rangbah Duh Narendra Modi, ki la don ki sienjam ban kyntiew ia ki bynta kiba sahdien, kiba sahdien bha, kiba shem jingeh ha ka imlang sahlang.
Ka Sorkar ka ngeit skhem ba kum kane ka jingkylla kam lah ban wan khlem da pynkhlain ia kakam cooperative. Lah ban shu kdew hangne ba kane ka prokram ka iahap bad ki sienjam jong ka India ban khyllie im ia ki kam cooperative.
La wanrah ia ki jingpynkylla ha ka rukom pyniaid kam, ki polisi bad ki ain khnang ban khyllie im ia ki kynhun cooperative kiba shem jingeh, pyniaid ryntih ia ki kam jong ki, bad wanrah ka jingshai bad ka jingiakhun hapdeng ki cooperative society.
Ka jingong u Myntri Rangbah Duh, ‘Sahakar se Samriddhi’ (Ka jingriewspah lyngba ka jingiatreilang), ka thmu ban pynlong ba ki kynhun cooperative jong ka ri ki long kiba lah ban kyrshan ialade bad kiba khlain.
Da kaba pyniar ia ka rynsan cooperative, la wahrah ia kawei pat ka rukom treikam na ka bynta ka ioh ka kot – kaba iahap bad ka jingthmu jong u Myntri Rangbah Duh ban tei ia ka ioh ka kot jong ka India kaba kot sha ka $5. Kane ka rukom treikam kan iarap ia ka jingkiew shaphrang ka India bad kan long ruh kaba ai mynsiem ia ka roi ka par jong kiwei kiwei ki ri.
Ka nongrim jong ka India ha kaba iadei bad ka jingiatreilang ka dei naduh ki por hyndai, ha kaba ki tynrai ki don ha ki rukom treikam ha ka tynrai bad ka ioh ka kot. Ki jingbatai ha ka Arthashastra jong u Kautilya ki pyni ia ki jingiatreilang, kum ka jingtei ia ki iingmane bad ki dam na ka bynta ka bha ka miat ki paidbah ha ki shnong.
Kumjuh, ki rukom treikam na ka bynta ka ioh ka kot ha South India ki pyni ia ki rukom iatreilang. Bun ki riewstad ha ki kam ka ioh ka kot kiba la ioh jinghikai ha ka rukom pyrkhat jong ka thain sepngi ki la sdang ia ka jingiakren haba la sdang ki spah snem ba 21 ba ka jingiatreilang ka la kut ha kane ka juk mynta.
Hynrei, ngangeitskehm ba ki rukom treikam na ka bynta ka ioh ka kot ba la sdang da ki ri bapher bapher kiba don 30 million, 50 million ne 100 million ngut ki briew kin ym iahap bad ka ri kum ka India kaba don kumba 1.4 billion ngut ki briew.
Khnang ban tei ia ka ri kaba riewspah, ka long kaba donkam ban kyntiew ia baroh ki dak jong ka jingkiew ka ioh ka kot bad ruh ban pynthikna ka jingriewspah jong 1.4 billion ngut ki briew, ai kam ia baroh bad pynthikna ba ki don ka lad ban don ka jingim kaba don burom. Bad kane ka lah ban urlong tang lyngba ka jingiatreilang. Ki don shibun ki nuksa ha ka histori jong ngi kiba pynskhemia kane ka jingngeit.
Ka Ahmedabad District Cooperative Bank, kum ban shu kdew, ka la iohnong haduh T 100 klur ha ki shi spah snem. Kam don ki Non-Performing Asset (NPA), bad ki jingkynshewpisa jong ka ki tam ia ka T 6,500 klur. Ka Amul ruh ka dei ka nuksa jong ka jingiatreilang.
Mynta, 35 lak tylli ki longiing ki ioh ladkamaijakpoh bad ka jingim kaba don burom lyngba ka Amul bad ki longkmie ha kine ki longiing ki don ka bynta kaba heh bad ki long ki nongialam. Namar kane, ka jingdie mar ka Amul ha ka shi snem ka la kot sha ka T. 80,000 klur. Hap ruh ban kdew hangne ba kine ki longkmie kim shym la bei tyngka palat T. 100 haba sdang ia ka kam.
Hapoh ka jingialam jong u Myntri Rangbah Duh Narendra Modi, ka Sorkar ka la wanrah 60 tylli ki sienjam ban khyllie im bad pynkhlain ia ki kam iatreilang ha India. Da ki snem ka jingiehbein bad ki kynrumkynram ha ka rukom pyniaid kam ka la pyntlotia ka ioh ka kot jong ki Primary Agricultural Credit Society (PACS).
Ban pynbeitia kane, ka Sorkar ka la pyniar ia ki lad jong ki PACS bad plié ia ki lad ka ioh ka kot jong ki. Lyngba ka jingpdiangia ki ain ba thymmai, ki PACS mynta ki lah ban trei ha 30 tylli ki kam, ba kynthup ki kam kiba iadei bad ka dud, ka jingridohkha, ka jingbuh ia ki mar bam, bad ka jingpyniaid ia ki Jan AushadhiKendra.
Ka jingsdangialai tylli ki national-level multi-state cooperative society ba thymmai ka la kyntiew ia ki kam iatreilang. Ka National Cooperative Exports Limited ka la plié ia ki lad sha ki iew ha kylleng ka pyrthei na ka bynta ki nongrep katba ka National Cooperative Organics Limited ka ai ka rynsan ban ioh ia ki syrnot organic bad ki iew na ka bynta ki mar organic.
Ka BharatiyaBeejSahakariSamiti Limited ka la pynthikna ia ka jingioh ki nongrep ia ki symbai ba bha. Shuh shuh, ki sienjam ka Sorkar kum ka jingai jingiarap pisa, ka jingpynduna ia ki khajna, bad ka kam khleh ethanol ki la khyllie im ia ki kam iatreilang ban pynmih shihi.
Ban pynkhlain ia ka jingiatreilang ha ki kam bank, la ban jur halor ka jingpyniaid ia ki pisa jong ki kam iatreilang sha ki cooperative bank. Ki sienjam ban kyntiew ia ka jingshai, kum ka jingsdang ia ka National Cooperative Database, ka la pyniaid ryntih ia ki kam bad ka la pyniar ia ki kam iatreilang sha ki jaka ba dang sahdien. Shuh shuh, dang wanrah ia ka National Cooperative Policy ban wanrah ia ka rukom treikam kaba khlain ban kyntiew ia kane ka kam.
Ka ICA General Assembly and Global Conference 2024 kan long ka rynsan ban pyni ia ka jingjamshaphrang ka India ha ka jingai bynta ia baroh ha ki kam ka ioh ka kot, ka jingweng ia ka jingduk, ka jingpynthikna ia ka jingryntih kyrdan ki shynrang bad kynthei, bad ka jingdon bynta ha ka jingpynurlong ia ki thong United Nations Sustainable Development Goal (SDG) lyngba ki kam iatreilang kiba khlain.
Ka kam kaba kongsan jong kane ka jingialangka dei ban tei ia ka jinglong jingman kaba khlain kaba plié lad ia ki cooperative ba kin pynbeit ia ki jingeh kiba thymmai bad shim ia ki lad kiba thymmai. Ka long kaba donkam bha ia ki cooperative ha kylleng ka pyrthei ba kin iatylli lang bad noh synniang sha ka jingtei ia ka lawei kaba kham bha bad kaba kham iaineh ia baroh.
Katba ngi pynkhrehia ka jingpynlong ia kane ka prokram, nga khot sngewbha ia baroh ki nongialam ha ki kam iatreilang, ki nongthaw polisi bad kito kiba trei na ka bynta ka jingkyntiew ia ki briew ha kylleng ka pyrthei. Lyngba ka jingiatreilang, to ngin pdiang ia ka jingioh jinghikai, ka jingiasam bad ka jingiatreilang ban pynkhlain ia ka kam cooperative ha ka pyrthei.
Ka jingkut jingmut ka India na ka bynta ka “Sahakar Se Samriddhi” kam dei tang ka jingthmuhynrei ka dei ka jingkular ba kyntang ban tei ia ka lawei kaba skhem ha ka jingriewspah lang, ka jingiaineh bad ka jingkiew lang shaphrang.
