Shillong, Nailar 29: Ha ka jingialang ba la khot da ka SNSBH kaba la long ha Umlyngka ha ka 26 tarik u Nailar 2017, la thoh ha ka kotkhubor Mawphor ba uwei na ki nongkren bad nongialam rangbah u la ong ba kam dei satia ka kam kaba eh ban weng noh ia ka jingkyntur pud MUDA sha ki jaka bym dei . Halor kane ka jingong, ka KHNAM ka kwah ban buh jingkylli kumne khnang ba ngin tip ia ka jingshisha.
Hato ki nongkren ki tip ne em ba ia ka Meghalaya Town & Country Planning Act 1973 la pyntrei kam ha ka Jylla baroh kawei naduh u snem 1989 bad ba ia ki pud sawdong jong ka Shillong Master Plan la pynmih ha ka Meghalaya Gazette ha ka 4 tarik January 1990 , la 27 snem mynshuwa? Lada ym tip te ym nang shuh ban ong kumno kumno, hynrei lada tip pat, balei bym leh ei ei naduh mynshuwa ?. Myntoi aiu ban ong ba suk ban weng ia ka jingkyntur pud ka MUDA tang shuwa ka election 2018 haba shu sngap la katta snem?
Halor kane, sngewdei ruh ban iatip paitbah ba nga la ai RTI ia ka Urban Affairs Dept ha ka 20/03/17 halor kiba bun ki bynta trei kam jong ka MUDA bad la ioh jubab ha ka 12/04/2017 la ong u Bah T.H.S Bonney “Ki original copy jong ki jubab ki don bad nga kum u Chief Adviser bad kyrtong MP jong ka KHNAM, ynda nga la ioh jubab, ryngkat bad ki map jong ka Shillong Master Plan, Jowai Master Plan bad Byrnihat Scheme areas, la khot ruh ia nga da ki nongialam jong ka SNSBH Upper Shillong Areas hapoh Umlyngka Dorbar Hall ban pynshai lem halor ki kyndon jong ka Meghalaya Town bad Country Planning Act 1973 bad nga la pynkylla Khasi ruh ia kiba bun ki kyndon jong kane ka Act shuwa ka jingialang paibah ha ka 26 tarik”.
Kaba sngewlyngngoh ka long ba ia ki nongialam na kiwei ki seng la khot ban kren ha kane ka jingialang, hynrei ia ki jingpynshai ba shisha kat kum ka jubab jong ka RTI khlem ia kren ei ei ha kane ka jingialang. Halor kane, u Bah T.H.S Bonney u kwah ruh sa shisien ban pynshai ia u paitbah ka Bri U Hynniewtrep ba ka Meghalaya Town bad Country Planning Act 1973 ka trei kam ia ka Meghalaya baroh kawei. Ki ain pynrkhing ka MUDA mynta ki trei kam ia ka Jowai, naduh Mihmyntdu shaduh Riatsohsim bad Byrnihat namar la dep shna ia ki Master Plan bad Scheme ia kine ki ar tylli ki sor.
Kam slem ba ka sorkar Meghalaya kan pynrung ia ki ain MUDA ia ka Mawkyrwat, Nongstoin, Nongpoh, Khliehriat, Smit bad kumta ter ter bad baroh kiba shna iing kin sa ktha khlieh. Na ka liang jong u Bah T.H.S Bonney u khot sngewbha ia ki paitbah nongialam na ki dong bapher bapher jong ka Bri u Hynniewtrep ban ia snoh lang bad ka KHNAM ha kaba peitngor ia kane namar ioh pynrung MUDA napoh napoh suki suki bad sa shu ktha khlieh hadien kumba ktha khlieh ki khap sor Shillong mynta, ong u Bah T.H.S Bonney IFS(Retd). Chief Adviser KHNAM.