Shillong, Nailur 11: Ka seng kur Mei-Sin kala phah ia ka jingthoh sha u Chief Executive Member jong ka KHADC ban kyntu ia ka District Council ba kan ai por ban ai jingmut ia ka ka Khasi Custom and Lineage Bill, 2018.
Na ka liang jong ka seng kur Mei-Sin ka kyntu ia ka KHADC ba kan ai por ym duna 6 bnai ei ei ba ka Seng Kur bad kiwei kiwei ki Seng Kur kumjuh, ban phah la ki jingai jingmut halor kata ka amendment kaba thmu ban pynduh jait Khasi bad pynduh bynta ia ki kynthei Khasi kiba ioh lok ne tnga da ki bym dei Khasi.
Ngi la bthah ia ki kpoh ba kin pynlong la ki jingiasyllok iaphylliew jingmut halor kane ka phang bad ba kin phah la ki jingshem bad jingai jingmut shwa ban kut U Nohprah mynta ka snem bad hadien kata, kan sa long sa ka jingialang iaphylliew jingmut da ka Seng Kur pyllun hapoh ar bnai jong ka snem thymmai khnang ban poi tang ha kawei ka jingmut bad ka thong.
Khnang ban tip, ka Seng Kur ka Mei-Sin bad ki khun jong ka, ka don 7 kpoh, kata, Majaw, Kurbah kynthup Rapsang Kurbah/Marbisu, Basaiawmoit kynthup Lyngwi, Syngkli kynthup Muktieh bad Be, Khongji kynthup Khongwar, Lyngdoh Peinlang bad, Hynniewta kynthup Langpen.
