PIB: Ia mynta, ki don 2902 ngut kiba shitom COVID-19 ha ka Ri, kiba khlad 68 ngut

New Delhi, Iaiong 04: Mynta ka sngi ka khubor kaba la pynlait paidbah lyngba ka “Press Information Bureau” jong ka sorpdeng ha kaba ia dei bad ka COVID-19 haduh mynta ka sngi kiba la pynthikna ba ki don iane ka jingpang ki long 2902 ngut bad kiba la khlad ki long 68 ngut.

Kiba la koit na kane ka jingpang bad  kiba la shah ba kin mih na ki jaka ai jingsumar baroh ki long 183 ngut, na kitei 1023 ngut kiba la ioh ia kane ka jingpang ki don ka jingiadei bad ka Tablighi Jamaat kiba la ktah sha ki 17 tylli ki jylla.

Ha ka jingpiet halor ka jingkhlad, kiba bun kiba khlad ki dei kiba la kham heh ka rta kiba don ruh ia ka jingshitom kum ka diabetes, hypertension, kidney lane cardiac bad kiwei kiwei de.

U myntri rangbah duh jong ka Ri India u la pynlong ia ka jingpeit bniah ha ka Ri baroh kawei ha kaba ia dei bad ka jingpynkhreh bad ka jingdon ki Hospital, ki jaka buh ban sumar ha ki jaka bala buh kyrpang, ban peit bniah ia kane ka jingpang, ki jaka test bad ka jingai jinghikai ia kiba don ha ka jingsumar.

Ha ka juh ka por la bthah ia baroh ki kynhun bad ia ki briew sorkar ban pynthikna ba kan don ka jingpynmih kaba biang, ban thied ia baroh ki tiar ba don kam ia ki tiar na ka bynta ki nongsumar kum ki PPEs, ki Masks, ki Gloves bad ki Ventilators.