Shillong, Risaw 14: Mynta ka sngi ka seng HITO kala leit ban bret da ki syntiew h khmat secretariat, ha ophis jong ka BJP, ha iing sah u mytnri rangbah ka jylla bad ha ophis jong ka party NPP ban pynpaw ia ka jingpyrshah ia ka jingshah siat lyer pynsat khmat ki nonghikai bala shah weng kam.
Shwa ban iaid paidbah kila pynlong ia ka jingialum ha khmat ka dur mot jong u Kiang nangbah ha jan Civil Hospital Shillong, na kane ka jaka kila iaid sha khmat secretariat ha kaba kila bret ia ki syntiew ha ryngkat ki jingpyrta pyrshah ia ka sorkar.
Na Secretariat kila iaid sha ophis jong ka BJP, sha iing sah jongu myntri rangbah ka jylla ha Oakland bad pynkut sha ophis jong ka party NPP kaba don ha Lachumier, bad ha kane ka jaka kila ia pyrta ba ka NPP ka dei ban kylla kaba mut.
Ha kane ka sngi ki dkhot ka seng na kylleng ka Ri Khasi Jaintia kila ia wan ban ia shim bynta ha kane ka jingia iaid paidbah kiba la ia poi da palat spah ngut ki dkhot ka seng HITO ban pynpaw ia ka jingpyrshah ba shah siat lyer pynsat khmat ia ki nonghikai.
Ha kane ka jingiaid paidbah kila ia pyrta ban pynrem ia ka kane ka sorkar MDA kaba la ialam da ka party NPP, kila shim ia ka kyrteng u myntri rangbah ka jylla u Conrad K Sangma, kila pynrem a u mytnri kam poh iing u bah Lahkem Rymbui, kum juh ia u bah Prestone.
