Shillong, Nohprah 29: U State President jong ka BJP Meghalaya State Unit u bah Ernest Mawrie mynta ka sngi u la ong ba ka party kala dep ban pynkhreh ban ujor pyrshah ia ka jingtyrwa ka party TMC ka ‘We Card’ sha ka Election Commission jong ka Ri India.
Haba kren ha ki lat pathai khubor ha ophis treikam jong ka party u bah Ernest Mawrie u la ong ba kane ka jingtyrwa jong ka TMC ka long kumba thied ia ki nongthep vote shuwa ka elekshon MLA sha ka iing dorbar thawain ka jylla Meghalaya ban long ha u snem 2023.
Ha ka jingpynrung kyrteng ka party TMC kaba la buh kyrpang tang ia ki riew kynthei kala tyrwa ba kan ai T.1000/- tyngka shibani bad ha ka shisnem ka long T.12000/- tyngka shisnem tang lada ka wan ka habor, kane ka dei ka kular elekshon ka TMC ka long kumba thied ia ki paidbah.
La ong ba katum ka ain People Representation Act, kam shahia ki party ban pynmih ia kum kine ki jngkular bad kum kane ka jingkular kala jia ha Utter Pradesh da ka BSP ban ai light ei 300 unit haba la ujor shaka ECI ka ECI kala phah khang noh, ngeit skhem ba ka juh ka rai kan long ia kane ka jingtrwa ka TMC.
Bah Ernest la ong ba ki muktiar jong ka party kila dep ban pynkhreh ia ka jingthoh bad kin sa phah ia ka jingujor sha ka ECI jong ka Ri India ha kine ki sngi pyrshah ia kane ka jingleh jong ka TMC, la ong ba ki paidbah ki dei ban kylli lada kam wan ha ka bor kan jia aiu la ong u president ka BJP Meghalaya State Unit.
