Shillong, Jylliew 28: Ka jingbym pynlait ka sorkar jylla ia ka bhah khajna jong ka Jaintia Hills District Council kaba dei na ki marpoh khyndew bad na ki khajna kali kala buh ia ka Jaintia Hills Autonomous District Council ha ka jingeh ban siew ia ka tulopjng ki nongtrei ha katei ka District Council.
Kane ka jingbym ioh ia ka bhah na ka sorkar kala pynlong ia ka JHADC ban nym lah ban siew ia ka tulop mynta la 12 bnai lynter ia ki nongtrei kiba don haduh 1000 ngut ei ei kynthup ia ki nonghikai kiba ka District Council kiba don kumba 300 ngut ei ei, namar ki don ki skul kiba ka District Council ka dang pyniaid.
Ki thymmei khubor na katei ka JHADC ki iathuh ba ka pisa kaba dang dei ban ioh na ka sorkar kaba dei ka bhah na ki marpoh khydnew ka dang sah bun phew klur, hyrei ka jingeh ka long ba ka sorkar jylla kam ai ia ka jingkhein kaba bniah.
Kane ka jingbym ioh ia ka tulop kaba dang sah mynta 12 bnai kala ktah ia ka iing ka sem jong ki nongtrei katei ka ophis ban pyndap pynbiang ia kiba bun ki kam iing kam sem. Wat ha pdeng kane ka jingeh ki nongtrei ki poi sha ka kam man ka sngi ban pynthikna ba ki kam jong ka ophis kin nym dkoh.
Ka jingdon ka EC kaba la ialam da ka NPP ha katei ka District Council ha JHADC bad ia ka sorkar jylla kaba la ialam da ka NPP, kala don ka jingkhmih lynti ba ka sorkar jylla kan pynlait noh ia ki bhah jong ka JHADC ban ioh bans iew ia ka tulop ki nongtrei.
