Shillong, Jylliew 28: Ki nongialam jong ka KSU seng kmie hapoh ka jingialam jong u President u samla Lambokstarwell Mangar mynta ka sngi kila leit ban ia kynduh ua u bah Pyniaid Sing Syiem CEM ka KHADC ban pynkynmaw halor ki lai tylli ki mat kata haba iadei ka mat Uranium, Inner Line Permit bad ka lynti Rel.
U Samla Lambokstarwell haba kren ha ki lat pathai khubor ha dien ka jingiakynduh bad u CEM la ong ba ka seng na ka por sha ka por ka dawa ba ymdei ban ailad ban tih ia u uranium ha ka jylla, namar lada ailad ban tih ia u uranium ka lah ban don ka jingktah ha ba iadei bad ka koit ka khiah jong ki briew ki ba shong ba sah ha kitei ki jaka.
U la ong ruh ha lor ka jingkhang noh ka UCIL ia ka ophis treikam jongka ha u snem 2018, ka long shibynta ban pynthame ia ki paitbah ba kan nym iaid shuh shakhmat, hynrei haduh mynta ka dang iai tynruh sop sop na sharum shaneng.
Kane ka jingthmu jong ka sorkar India ban tih ia u uranium ha ka jylla kam shym la shongthait, lah ban ong ba kane ka jingpyrshang kam paw shuh shabar hynrei ka jingpynbeij ka iaid napoh sopsop, haba ka don ruh ka jingwan ki briew na central ban iasyllok ia ki briew jong ka thain bad ki trai jaka.
Halor ka mat ban pynpoi lynti rel ha ka jylla Meghalaya, na ka liang u president ka KSU u la maham tyngeh ia ka District Council ban ai NOC ban pynpoi lynti rel ha ka jylla Meghalaya, Katba ka sorkar India kam pat lah ban pyntreikam ia ka Inner Line Permits (ILP).
U President rangbah ka KSU ha kajuh ka por u la phah ia kane ka khubor sha ka sorkar jylla ba kan buddien shuwa ia rai ka iing dorbar thwain ka jylla halor ka ILP, hynrei, lada ka sorkar jylla bad ka sorkar India ka leh da ka bor halor kane, ka seng ruh mam salia ban shim da kano ma ka sienjiam ba donkam.
