Shillong, Naitung 04: ka dor die lang ia u khaw mynta ka sngi ha Iewduh Shillong ba baroh hynniew jait ki khaw ba dei paidbah ha iew ha hat kala kiew dor mynta ka sngi bad kane kala ktah shisha ia kiba bylla sngi kiba don hapdeng ka jingduk jingkyrduh na kane ka jingkiew dor u khaw.
Katkum ka dor kaba la ioh mynta ka sngi na ki dukan dielang ia ki jaitkhaw bapher bapher, u khaw Arham u shongdor T.50 bad T.40 tyngka shikilo bad ha ka shibyrni u don 50 kilo ka dor kala kot sha ka T.2500/- haduh T.2000/- tyngka u ne dei u khaw ba rem eh ha iew mynta ba ia thied paidbah.
U khaw Arham Bpt ka dor ka long T.46 tyngka shikilo ha ka 50 kilo ka dor ka long T.2300/- tyngka, u khaw Arham Gold shikilo ka dor ka long T.38 tyngka bad ha ka 50 kilo ka long T. 1900 tyngka, u khaw Parimal kador shikilo ka long T.39.5 bad haka 50 kilo ka long T.1975 tyngka.
U khaw paidbah ka dor ka long T.32 tyngka shikilo bad ha ka 50 kilo ka long T.1600/- tyngka bad u Boil Rice ka dor ka long T.38 tyngka shikilo ha ka 50 kilo ka long T.1900/- tyngka bad u khaw anytime ka dor jong u ka long T.38 tyngka shikilo bad ha ka 50 kilo ka long T.1900/- tyngka.
Kane ka jingkiew dor kynsan kala buh ia ki paidbah ha ka jingeh kaba khraw kiba hap ban thied khaw man ka sngi, bun na ki paidbah nongshong shnong ha ka jylla ki don shibun ki bym don ia ka kard ration.
Kane ka dor kaba u SP news u la kdew ka dei katkum jinglum jingtip na ki nong dei lang ia u khaw ha Iewduh, ban pynkynmaw ba u Saleng A Sangma MLA jong ka seng Congress ha kine ki sngi u la kren halor kane ka jingkiew dor kynsan u khaw ha iew ha hat bad kane kala ktah ia ki paidbah, u la ong.
