Shillong, Naitung 04: U Bah Paul Lyngdoh Myntri ka Tnad Social Welfare ula pynbna ba ka sorkar jylla ka la thung ia ka Advisory Board, ka ban pyntreikam pura iaka Prevention of Illicit Traffic in Narcotic Drugs and Psychotropic Substances (PIT NDPS) Act 1988 ban iakhun pyrshah iaka jingdie drok ha ka jylla.
U Bah Paul Lyngdoh u la ong ba ia kane ka Board yn khlieh da u Nongbishar ba la shongthait ka Iingkashari High Court, Justice Shivaji Pandey kum u Chairman ryngkat bad ar ngut ki dkhot kiba dei ki i Senior Advocate kata u Bah ND Chullai bad ka Tsering Yangi.
U bah Paul Lyngdoh u la ong haba iakren bad ki nongthoh khubor, da ka jingdon jong katei ka Advisory Board kyrmen ba yn lah ban pyntreikam pura ia ka PIT NDPS Act naduh mynta ka sngi
U la ong ruh ba katei ka Act jong u snem 1988 ka long kaba khlaiñ ha kaba iadei bad ka jingtehlakam ia ka kam die drok ha ka jylla kumba la kdew shai ha ka Clause 10 jong ka Act, kaba long kum kawei na ki jaka, kaba u drok u jyllei bha kiba die bad kiba pyndonkam.
Une Myntri Sorkar u la ong ba ka daw bah ba la pyntreikam ia ka aiñ kaba khlain ka dei namar ka daw ba ka aiñ Narcotic Drugs and Psychotropic Substances (NDPS) Act 1985, ka don shibun ki jingduna bad kam lah ban tehlakam ne pyrkhing bha ia ki nongdie drok.
Ula ong ba lyngba ka jingpyntreikam pura iaka PIT NDPS Act, kan shimkhia ia ki jingujor pyrshah ia ki briew kiba la mlien bha ha ka kam die drok wat hadien ba kila ioh mih na ki thanad pulit ne phatok.
U Bah Paul ula ong ba kane ka ain kan phaikhmat bha ia katei ka bynta namar kan pynkup bor iaka jylla ban bat ia ki briew haduh 6 bnai bad ban pynjlan sa 6 bnai lada ki dei ki briew kiba mlien ban khaii ne die drok be-aiñ hynrei lada dei ba ia ka jingbat hap ban pynjlan sa 6 bnai yn hap ban ioh ia ka jingmynjur na ka Advisory Board.
Shuh shuh u bah Paul Lyngdoh u la ong, Ka sorkar jylla ka don ia ka bor ban set 3 bnai haduh 2 snem ia ki nongdie droks. Uno uno uba shah kem lyngba katei ka kyndon aiñ bad lait noh na ka jingbthah jongka Advisory Board, un dang lah ban shah kem biang bad ban shah set biang lada jia ba ka don kano kano ka jingujor pyrshah ia u.
Kiba shah kem kin shah pynkynriah ruh na kawei ka jaka sha kawei pat hapoh ka jylla ne wat shabar ka jylla ruh .U la pynpaw ruh ia ka jingthmu jong ka sorkar ban buh ia katei ka Board bad ban pyntreikam pura ia katei ka aiñ ka long ban lah ban tehlakam ia ka jingjyllei u drok ha ka jylla bad ban rat dyngkhong ia une u jingdih pynbuaid u ba sniew u ba ktah ia ki ba bun ki samla bad ba la pynsniew ia ka imlang sahlang baroh kawei.
