Shillong, Naitung 9: U Lat ka jylla u Phagu Chauhan mynta ka sngi u Blei u la leit ia don bynta lang ha ka jingleh niam Behdieñkhlam ba shisien shisnem Jowai, ha kaba u Chief Justice jong ka High Court Meghalaya u Justice Sanjib Banerjee u la ia don lang, u Myntri ka jylla u bah Kyrmen Shylla la don lang.
Kane ka jinglehniam Behdienkhlam kaba lai sngi kala sdang naduh ka 6/7/2023 bad la pynkut mynta ka sngi da ka noh rot ha Aitnar ka pung um ba khuid ba kyntang ha kaba da ki hajar ngut ki briew na kylleng kila poi ban ia shim bynta ha kane ka jinglehniam ka Niamtre.
Haba kren ha kane ka jingleh niam, u Lat ka jylla u la ai ka jingiaroh halor ka jingdon ia kane ka shad bad ka riam tynrai kaba ka jylla ka don, u la iaroh ia ka jinglah ban pynneh pynsah ia ka jinglong tynrai bad kane ka jinglehniam Behdienkhlam ka pyni ba ka riti dustur ka dang im.
U Lat ka jylla u pynpaw ia ka jingsngewkmen ban kane ka jinglehniam kan wanrah ia ka jingiatylli kawei, ka jingsuk bad ka jingkiew ha ka kamai kajih ia ki briew jong ka jylla baroh kawei, ka jingmut jong ka Behdienkhlam ka long ban beh krad ia u ksuid u khrei ban phet krad sha jngai.
Ia kane ka jinglehniam Behdienkhlam la juh pynlong ha ba kut jong u bnai Jylliew ne sdang bnai Naitung, kane ka jinglehniam ka long ha dien bala dep ban thung kba, kane ka long ban pynsngewbha ia blei ka rep ka riang ba u kba u sohbha.
