Namar ki jingklumar baroh ki dukan ha Shillong ki hap khang por 10.00 baje mynmiet: DC

Shillong, Naitung 10: Ka Deputy Commissioner jong ka East Khasi Hills District ka kong R M Kurbah mynta ka sngi Nyngkong kala pynbna bala pynjari iaka kyndon 144 CrPC ha kaba la hukum ba baroh ki dukan ha kane ka nongbah Shillong ki hap ban khang noh hapoh ka 10.00 baje mynmiet naduh ka sngi Balang ka 12/7/2023.

Na ka daw ba kila mih ki jinghuri hura bad jingklumar ha kylleng ki bynta jong ka nongbah Shillong, kum ka lat ban iada bad ban ai ia ka jingshngian ia ki nongleit nongwan hapoh kane ka nongbah Shillong la pynjari ia ka kyndon 144 CrPC katkum ki kyndon kiba la pynkup bor.

Ka jingplie ia ki dukan, jaka die bam, ki Restaurants bad kiwei kwei ki dukan ha sawdong kane ka nongbah Shillong kila hap ban khang noh ia ki dukan ha ka por 10.00 baje mynmiet, la khang ia ki briew ban ia shong ha ki kali ban leh ia ki kam beain, la khang ba kim dei ban tem jingrwai palat pud ha khmat jaka pule ne jaka mane blei, ha ki jaka ban don ki Hospital, bad ki jaka iing sah briew.

Na ka liang jong ka District Magistrate kala maham ba lada don kino kino kiba pynkhein ia kitei ki kyndon ki shah pynshitom hapoh ka kyndon 188 jong ka IPC  bad kane ka jingpynbna kan trei kam noh mardor naduh ka 12^th Naitung 2023.