Shillong, Naitung 11: Mynta ka sngi Ki shnat jong ka seng samla pule ka Khasi Student’s Union (KSU) kila leit ban ia kynduh ia u bah Thombor Shiwat Chief Executive Member jong ka Jaintia Hills Autonomous District Council ha kaba kila ai ia ka jingthoh kaba kila kren shai ba kim bit, ban ai jingbit ban shna lynti rel sha Jaintia Hills.
Ha katei ka jignthoh kaba la ai sha u CEM jong ka JHADC la thoh ba ha dien ba ka seng kala ioh ia ka jingkren na ka sorkar ban pynpoi lynti rel sha Jaintia Hills, ka seng ka pynpaw ia ka jingpyrshah kaba jur haba ka sorkar kala pyrshang ban wanrah ia ka lynti rel.
Ka seng KSU kala pyrshah ia ka lynti rel naduh u snem 1988, ka jingpyrshah ka long halor ka nongrim ba lada wan ka lynti rel kan wanialam ia ki jingbuhai shnong jong ki briew na shabar ka jylla, ka seng kan pyrshah ia ka lynti rel katba ym pat don ia ki ain ban iada ia ka jaidbynriew.
Ka sorkar ka dei ban bud dien ia ka rai kaba la pdiang da ka iing dorbar thawain ka jylla ban pyntreikam ia ka Inner Line permit ha kane ka jylla kaba ym pat iohi dak ei ei hapoh ka jylla haduh mynta, ka seng kam pyrshah ia ka roi ka par hynrei ka pyrshah ia ka jingiuhroit ia ka jaidbynriew.
Kane ka jingthoh kaba la ai ka long ban pynrkhat ia ka District Council haba ka shim ia kano kano ka rai ban kan nym ktah ia ka jaidbynriew, ka seng ka kren shai ba ka District Council kam dei ban ai jingbit ban shna lynti rel sha Jaintia Hills.
