Shillong, Naitung 12: Mynta ka sngi ki lai tylli ki District Council kiba dei jong ka jylla Meghalaya, ka Khasi Hills Autonomous District Council, ka Garo Hills Autonomous District Council bad ka Jaintia Hills Autonomous District Council kila ia kynduh lang ha ophis jong ka KHADC ha Shillong ban ia kren halor ka jingthmu ka sorkar pdeng ban pyntreikam ia ka Uniform Civil Code ha ka Ri India.
Ha kane ka jingiakynduh ia ka KHADC la lam khmat da u Chief Executive Member u bah Pyniaid Sing Syiem, ia ka JHADC la lam khmat da u Chief Executive Member u bah Thombor Shiwat bad ia ka GHADC la lam khmat da u Chairman u R.K Sangma, ha kane ka jingiakynduh kila shim ia kawei ka rai ba kin thoh sha ka National Law Commission ban pynlait ia ka jylla Meghalaya na ka UCC.
Haba kren ha ki lat Pathai khubor ha dien ka jingialang u CEM jong ka JHADC u bah Thombor Shiwat la ong ba, ka jingiakren jong ki mynta ka long ban ia sngewthuh jingmut lang kawei ban phah ia ka jingthoh sha ka NLC lada pyntrei kam ia ka UCC ha ka Ri India dei ban pynlait ia ka jylla Meghalaya katkum ki ain kiba la don.
La ong ba ki don ki ain kiba la don ban iada, dei halor kane ka nongrim ba kin thoh sha ka National Law Commission ba lada ka sorkar pdeng ka pyntrei kam ia ka UCC ha ka Ri India, hynrei dei ban pynlait ia ka jylla Meghalaya na ka UCC, katkum ki ain kiba la don ki ba ia da naka bynta ki riew lum jong kane ka jylla Meghalaya.
U CEM jong ka KHADC u bah Pyniaid la iathuh ba mynta ka sngi kin ia pynbiang ia ka jingthoh ba kin ia soi lang da baroh lai tylli ki District bad la shai ka sngi ka 13/7/2023 kin phah sha ka NLC namar ka por kaba la buh ba ka NLC kan pdiang ia ki jingthoh kan long ha ka 14/7/2023, na liang jong ki lai tylli ki District Council ki kwah ba ka jingthoh kan poi shuwa katei ka sngi kaba la buh.
