Shillong, Naitung 19: Ka All India Bank Officers’ Confederation ha ka19 tarik naitung 2023 ka la rakhe ia ka jingdap 55 snem jong ki, ha kaba ia kane ka sngi la tip ruh kum ka Bank Nationalisation Day. Ha kane ka jingrakhe jong ka All India Bank Officers’ Confederation, Meghalaya Unit ka la rakhe da ka ba thungdieng.
Haba ia kren bad ki jongthoh khubor u bah Davidson Lyngdoh u ba long kum u kongsan u la pynpaw ba balei ki pynlong khnang ia kane ka programme ka long ban iajan bad ki paitbah, khamtam lei ba ki don ki mat ba ki paitbah ki donkam eh ba tip bad ban ioh jingtip.
U bah Davidson , u la ong ba kawei na ki phang ba na kane ka khynhun ka kwah ban pynshai ia ki paitbah ka long, halor ka jingthmu jong ka sorkar ban pynlong bank shimet noh ia ki bank sorkar.
U bah Davidson Lyngdoh u la ong ruh ba kane ka jingthmu jong ka sorkar kan ktah shibun eh ia ki paitbah kiba duk ba suk kiba kham duna ka ioh ka kot, ki nongrep ha ki ba bun ki liang, khamtam lei ha ka liang ban pan ram na ki bank.
U la ong ruh ba lada ia ki bank sorkar, yn pynkylla sha ki bank shimet, ha jylla Meghalaya kan ktah ruh ia ka reservation ruh, da kaba u la ong ba ha ki bank shimet, yn ymdon shuh kata ka jingbhah kyrpang ia ki ritpaid (ST& SC).
U la ong ruh ba ka jingdon jong ki bank sorkar kan iarap ruh shibun ha ka iohkam iohjam namar ba ka don ka jingbhah kyrpang ia ki ritpaid, kum ba long mynta hi ha ki ban bun ki tnad treikam jong ki bank ha ka jylla ki khun samla ki ioh kam ioh jam, namar ka jingdon jong ka bank sorkar, ka jingdon jong ki bank sorkar ka la pynmyntoi shibun eh ia ki paitbah ha ki ba bun ki bynta.
