Shillong, Naitung 20: Ka Khasi Students’Union – Employment Monitoring Cell mynne ka sngi 20 tarik u Naitung, 2023 ka la phah dorkhas sha u Mytnri Rangbah ka jylla U Cornad K Sangma ban pynbeit halor ka jingthung kam thung jam ha Iingdak na bynta ki post Gram Dak Sevak (GDS), Asst. Branch Post Master (ABPM), Branch Post Master (BPM).
Kat kum ki tyllong khubor bad ka jingwad bniah jong ka Seng la lap ba man ka por ba ju lait kam ha Post Office, bun beit ki bar jylla kiba ioh kam namar ka Selection criteria ban ioh dei kiba dei ba nang ka ktien English bad Hindi bad kane ka long kawei na ki daw kaba long dieng pynkiang ia ki paidbah jong ka jylla.
Watla na ka liang Seng ka la kyntu ia ki bor pyniaid halor kane bad u Myntri Rangbah ka jylla u la thoh sha ka Ministry of Communication halor kane ka bynta bad sa pynrung ia ka ktien Khasi bad Garo. Hynrei ka Seng ka lap ba kane kam shim la iarap namar pat weng ia ka ktien English bad Hindi.
Halor kane bun ki bar jylla ki ioh beit ban apply bad ka jingioh marks kham bun marks ha Matric ka pynlong ia ki ban shah jied ha ka Merit List bad kane kam iahap satia ban shu jied tang da ka merit list da kaba peit ia ka marks merit khlem pynshong nongrim ia kiwei ki bynta.
Na ka liang ka Seng ka iai ban ba kine ki post dei beit ban ioh ki trai jylla namar ka kam kan kham suk ha kaba iadei bad ka ktien ka thylliej bad ka jingtip ki ki jaka. Bad ki briew kiba wan na bar kin eh bad pyntyllun ia ka kam.
Te ka Seng ka dawa na CM ba u dei ban pynbeit ia kane ka kam bad dei ban weng noh ia ka ktien English bad Hindi bad pynrung tang ia ka ktien Khasi bad Garo khang ba ki trai jylla kila ioh ia ki kam ioh jam ha Post office.
