New Delhi, Naitung 21: U Myntri Sorkar Pdeng ba dei khmih ia ki Tnat Kam Pohiing bad Cooperation, u Amit Shah u la plie ia ka National Mega Conclave halor ka jingpyllait ia ki jingshakri Common Services Centre (CSC) da ki Primary Agricultural Credit Society (PACS) ha New Delhi mynta ka sngi.
Ha kane ka jingialang, u Myntri Sorkar Pdeng ba dei khmih ia ki Tnat Communications, Electronics bad Information Technology and Railways u AshwiniVaishnav, u Myntri Khynnah jong ka Sorkar Pdeng ba dei khmih ia ka Tnat Cooperation, u B.L Verma.
U Secretary, Tnat Cooperation jong ka Sorkar Pdeng, u Gyanesh Kumar, Secretary, Tnat Electronics and Information Technology jong ka Sorkar Pdeng, u Alkesh Kumar Sharma bad Managing Director jong ka CSC-SPV u Sanjay Rakesh ki la iadonlang lem bad kiwei kiwei ki heh ki hain.
Ha ka jingai jingkren jong u, u Myntri Sorkar Pdeng ba dei khmih ia ki Tnat Kam Pohiing bad Cooperation u la ong lyngba ka jingiasohlang ki PACS bad CSC, mynta ka sngi la pynurlong ia artylli ki jingkut jingmut jong u Myntri Rangbah duh, u Narendra Modi ban pynkhlain ia ki kam cooperative bad ban kyntiew ia ka Digital India.
Ki jingkut jingmut jong u Myntri Rangbah duh, u Modi ban pynduh ia ka jingbam sap na ka jingsynshar lyngba ka CSC hapoh ka Digital India Mission bad ban pynpoi ia ki lad ai jingshakri sha ki tyngkong iing jong ki briew ba duk ba suk bad ban pynkhlain ia ka ioh ka kot ha ki jaka nongkyndong da kaba pynkhlain ia ka rukom treikam jong ka cooperative baroh kawei na ki PACS sha ka Apex da kaba thaw ia ka Tnat Cooperation ki la iasoh lang mynta.
U Amit Shah u la ong ba u Myntri Rangbah duh, u Modi u la ialam lynti ia ka Tnat Cooperation da ka jingiohijngai kaba khraw. U la ong ba lada hap ban pynkhlain ia ka jingiakhih ba iadei bad ki kam cooperative, kumta hap ban pynkhlain ia ka unit ba rit tam jong ka, ki PACS. U Shah u la ong lada ki PACS kim long kiba khlain, ka jingiakhih ba iadei bad ki kam cooperative kin nym long kiba khlain.
Kumta, ka sorkar ka la rai ban pyndonkam ia ki kor computer ha ki PACS ban pynlong ia ki kiba shai, ban pynthikna ka jingkitkhlieh jong ki bad kumjuh ruh ban pynthymmai ia ki khnang ba yn lah ban pyniasoh ia ki skhim jong ka sorkar bad ki PACS.
U Shah u la ong hapoh 20 sngi jong ka jingsengia ka Tnat Cooperation, u Myntri Rangbah duh, u Narendra Modi u la ai T. 2,500 klur na ka bynta ka jingpyndonkam ia ki kor computer ha ki PACS, bad lyngba kane 65,000 tylli ki PACS ki la pyndonkam ia ki kor computer.
U Myntri Sorkar Pdeng ba dei khmih ia ka Tnat Cooperation u la ong ym don kiwei ki lad ba kham khraw ia ka CSC ban pyntreikam ia ka mantra jong ka ‘Jingpynduna ka jingsynshar, jingpynbun ka jingshakri ka Sorkar ha kaba la pynpoi ia ki jingshakri sha baroh khlem ka jingbam sap’.
U la pyntip ba la pyniasoh palat 300 tylli ki skhim ioh jingmyntoi jong ka sorkar India bad ki sorkar jylla bad ka CSC. U la ong ba ym don kiwei ki lad ba kham biang ia ki PACS ban ai jingshakri CSC sha ki briew ba duk ba suk ha ki jaka nongkyndong, ki nongrep ki bym don jaka lajong bad ki jaitbynriew Dalit bad ki riewlum.
Mynta ki PACS bad CSC ki iasohlang kawei, kane ym tangbakan kyntiew ia ki lad ai jingshakri sha ki briew kiba duk, hynrei ka ioh ka kot ha ki jaka nongkyndong ruh kan ioh ka bor ba thymmai. Nalor kane, ngin lah ruh ban pyndonkam pura ia ki lad na ka bynta ka roi ka par jong ka ri.
U Myntri sorkarpdeng ba dei khmih ia ki Tnat kam pohiing bad Cooperation u la ong ki don 17,176 tylli ki PACS kiba la pynrung kyrteng haduh mynta. U la bynrap ba ka jingpynrung kyrteng palat 17,000 tylli ki PACS hapoh ki ar bnai ka dei ka jingjop.
U Shah u la ai khubleiia u Secretary, Tnat Cooperation bad ka kynhun baroh jong ka Tnat na ka bynta kane ka jingjop. U la ong na ka 17,176 tylli ki PACS, kumba 6,670 ki la sdang treikam bad ki PACS ba dang sah ruh kin sdang treikam ha ki 15 sngi ban wan.
Kane kanplie ki lad ioh kam ia kumba 14,000 ngut ki samla ha ki jaka nongkyndong bad kine ki samla ruh kin trei ban pynkhlain ia ka ioh ka kot ha ki jaka nongkyndong bad ki lad ai jingshakri ha ki shnong ki thaw.
U la ong 60-65% ki briew jong ka ri ki sah ha ki jaka nongkyndong bad kumta ngi hap ban pyrshang ban pynsted bad pyniar ia ka ioh ka kot ha ki jaka nongkyndong lyngba ka mantra jong ka “Sahkar Se Samridhi.”
U Amit Shah u la ong hapoh ka jingialam jong u Myntri Rangbah duh, u Narendra Modi, ha ki 9 snem ba ladep, ka Sorkar India ka la pynbiang ka bam, ki iing, ka bordingelektrik, ka um, ki tyndongshetjingshet, ki painkhana bad ki lad ai jingsumar haduh san lak tyngka sha 60 klur ki briew khlem kanokano ka jingsiew.
Mynta palat 17,000 tylli ki PACS kin long ka lad ban pynrung kyrteng na ka bynta baroh kine ki jingshakri bad pynsngew ia ki jingeh jong ki briew ha ki jaka nongkyndong sha ka sorkar.
U la ong ba u Myntri Rangbah duh, u Narendra Modi ym tangba u la ai ka Jan-Dhan account, Aadhaar card bad mobile, hynrei u la leh ka kam kaba khraw ban pynbiang ia ka optical fiber network ha ki shnong bad ki gram panchayat hapoh ka Digital India mission.
U Myntri Sorkar Pdeng ba dei khmih ia ki Tnat Kam Pohiing bad Cooperation u la ong ba ha ki 9 snem ba ladep, ka jingdon ki briew ba pyndonkam ia ka Internet ha ka ri ka la kiew da 250 percent bad ka dor jong shi GB ka data ka la hiar da 96 percent, kaba la iarap bha ia ki briew kiba duk ba suk bad kiba duna ka ioh ka kot ban pyndonkam ia kane ka jingshakri.
U la ong da ka jingpyndonkamia ki kor computer ha ki PACS, ka sorkar ka la pynlong ia ki PACS ba kin bun bynta bad pynkupbor ruh ia ki ban treikam kum ki FPO (Farmer Producer Organisation).
Nalor kane, la thaw lai tylli ki Multi-State Cooperative Society na ka bynta ka jingpynmih ia ki symbai, ka jingpyniaid iew ia ka rukom rep organic bad ka jingshalan ia ki mar jong ki nongrep.
La sdang ruh ia ka skhim kaba heh tam ha ka pyrthei ban buh ia ki marbam. U Shah u la ong ba ha ki 5 snem ban wan, ki PACS baritbaria kin pynbiang ia ka jingbuh ia 30% ki mar bam jong ka ri.
U Amit Shah u la ong mynta ki PACS ki lah ban sdang ia ka kam sam ia ka LPG, Diesel bad Petrol. Ki lah ruh ban plieia ki dukanreshon, Jan Aushadhi Kendra, PradhanMantriKisanSamridhi Kendra bad dukan die sboh.
U la ong lyngba kine ki kam, ki PACS kin long ki nongpyniaidia ki kam ba iadei bad ka ioh ka kot ha ki shnong. U Shah u la ong lada ki PACS kilong kiba seisoh kumta ki nongrep kin long kiba seisoh namar ka jingiohnong ka rung beitbeit ha ka account jong u nongrep.
U la ong ba ka sorkar ka la wanrah bun ki jingkylla ha kaba iadei bad ka ain bad ka rukom pyniaid ha ki kam cooperative bad ka la kyntiew ia ki kam ba iadei bad ka ioh ka kot ha ka rukom kaba bun bynta. U Shah u la ong ba ki skhim cooperative jong ka sorkarModi bad ki jingkylla kiba man ka por ki poi sha ki jaka nongkyndong.
Kumta ym don ba lah ban pynsangehia ka jingiakhih ba iadei bad ka kam cooperative ba kan long kaba khlain. U Shah u la kyrpad ia ki briew ban bam smai ban pynkhlain ia ki PACS bad rah shakhmat ia ka da kaba pdiang ia ka mantra jong ka ‘Ka jingseisoh jong ka shnong lyngba ka jingpynkhlain ia ki PACS’.
U Myntri Sorkar pdeng ba dei khmih ia ki Tnat Kam pohiing bad Cooperation u la ong ba hapoh ka jingialam jong u Myntri Rangbah duh u Narendra Modi, ka Tnat Cooperation dang shen ka la shim ia ka sienjam ba thymmai bad sdang ia ka kam ban pynphai biang ia ka pisa jong ki nongthep pisa ba sahkut ha ki cooperative society jong ka Sahara Group.
U la ong ba ka Tnat Coperation ka la phah ia ka jingkyrpad sha ka Supreme Court. Halor kane ka jingkyrpad ka Supreme Court ka la bthah ban phah T. 5000 klur sha ki Central Registrar of Cooperative Societies (CRCS) na ka “Sahara-SEBI Refund Account” ban siew ia ki ram jong ki briew ba la thep pisa ha ki cooperative jong ka Shaara group.
U la ong da ka jingbud ia kane ka jingbthah, la sdang ia ka rynsan ‘CRCS-Sahara Refund’ ha ka 18 tarik Naitung, 2023. U Amit Shah u la pyntip haduh mynta 5 lak ngut ki briew ki la pynrung kyrteng ha ka rynsan bad ka kam ban pynphai ia ka pisa sha ki briew kiba la thep pisa ka la sdang. U la ong ba kane kalong ka nuksa kaba khraw ba lada ka sorkar ka treikam ha ka rukom kaba peit jngai, lah ban pynbeitia ki jingeh kiba heh tam.
