Shillong, Naitung 24: Ka Hynniewtrep National Youth Front (HNYF) East Khasi Hills hynne ka sngi ka la pynpaw ia ka jingsewdiaw halor ka jingmih ka jingtei thymmai ha Them Iew Mawlong.
Haba kren sha ki lad pathai khubor u president ka HNYF Shillong City u bah Bless Dkhar halor kane u la buh por arsngi ia ka sorkar ban pynsangeh ia ki jingtei thymmai ha Them Iew Mawlong.
U bah Bless Dkhar ula ong ba kane ka jingmih ki jingtei thymmai ha Them Iew Mawlong ka long kaba be-ain namar kane ka jaka ka dang don hapdeng ka jingbishar ka Meghalaya High Court.
U la iathuh ba na ka liang ka seng ka la dep ban kynduh ia ka tnat Shillong Municipal Board (SMB) bad ka MUDA halor kane hynrei u la iaylthuh ba kim shym la lah ban ai jingpynshai halor ka jingmih kitei ki jingtei thymmai Them Iew Mawlong.
U bah Bless Dkhar u la ong ba Ka seng ka ai por ar sngi ia ka sorkar kynthup ia ka MSB bad MUDA ban pynshai halor kane ka mat bad lada ka sorkar kam leh eiei halor katei ki ba ka seng ka kwah jingpynshai, u la ong ba naka liang ka seng kan shim da kiwei pat ki sienjam bad ruh ka seng kan ujor da ka ejahar.
