Shillong Naitung 25: Ka jingialang jong ka Executive Committee jong ka Khasi Hills Autonomous District Council (KHADC) mynta ka sngi kala shim ia ka rai ban siew noh ia baroh ki Arrear basah jong ki nongtrei kynthup ki ophisar bad jong ki 8 ngut ki MDC barim bad ka jinglut baroh kan long T.6.5 klur, la ong u bah Pyniaid Sing Syiem CEM jogn ka KHADC.
Haba kren ha ki lat pathai khubor la ong ba kiwei ki rai kiba la shim ha kane ka jingialang ka EC mynta ka sngi ki long, ban pynskhem ia Notification ba la pynmih da ka Executive Committee ha ka 14 tarik naitung halor ka United Khasi Jaintia Hills District Fisheries Act,1954,kane ka long ba kito kiba pynlong ia ka jingiakop khwai dohkha dei ban da ioh jingbit na ka KHADC.
Katkum ka jingpynbna hapoh ka United Khasi Jaintia Hills District fisheries Act,1954 la pynkham bor iangi lyngba ka Rule29 jong ka Assam bad Meghalaya Rules,1954 bad la pynskhem ia ka jngpynbna ba baroh kiba pynlong ia ki jingiakhwai Dohkha kidei ban ioh jingbit na ka District Council kiba kyntup ia ki san tylli ki District.
Ha kane ka jingialang ka Executive Committee ka la rai ban pynthymmai noh ia ka Khasi Traditional Medicine Commission, ba kane ka Commission ka ju khot aplekeshon ia ki nongai dawai kynbat Khasi bad kino kino kiba kwah ban ioh ia ka jingithuh katkum kane ka Ain ki hap ban wan aplai ia kane.
Ha kajuh ka por, u la ong ba la rai ban plie noh shen ia ka Khasi Traditional Medicine Institute ha Lum Sohpetbneng kaba ladep ban pyntrei bad kaba sah mynta ka long sa tang katto katne ki kam barit baria kum ka umbam umdih bad kiwei de. Haba iadei bad kane ka Institute, yn sa khot ia ka EOI na kiwei ki Institute kiba na kane ka jylla bad na shabar kiba la pyntbit ia kane ka jingai dawai kynbat.
U CEM, u la ong ruh ba ka EC ka la rai bad ka don ia ka jingthmu ban buh ia ka Laboratory khnang ba ki nongsumar dawai khasi kin ioh ban buh ia ki dawai dashin jong ki ha katei ka jaka khnang ba kin long kiba khuid ba suba bad kan nym don jingktah ia ka koit ka khiah.
Ka KHADC dang phah jingthoh sha ka sorkar jylla ban ioh ia jingbit khnang ba ki nongai dawai kHasi ki ioh ban buh ia ki dawai dashin ha katei ka jaka ba kin long kiba khuid ba suba bad ka jingsong ia ki dawai ruh kan long katkum ka juk stad ba mynta.
Nalor kane, u CEM u la ong ba ka District Council ka don ia ka jingthmu ban iatreilang bad ka sorkar jylla bad ka la pynsngew ba na ka liang ka EC ka don ia ka jingthmu ban khot ia ki samla pule ne ki riew Rangbah kum ki nongwad bniah kiban tih bad wad bniah ia ka thymmei ka jinglong kyrpang ha ka riti dustur jong ka jaidbynriew.
La ong ba ki don kumba 17 tylli ki thymmei kiba hap ban wad bniah, Kine ki 17 tylli kin dei shaphang ka niam ka rukom, ka jingngeit, ka jingiathoh shong kurim, ka ktien ka thylliej, ka kolshor, ka synshar khaddar bad kiwei de,” ong u CEM u bah Pyniaid.
