Shillong, Naitung 29: U Lamphang ka iing dorbar thawain LokSabha, u Om Birla u la plie ia ka bynta kaba 20 jong ka Annual Conference jong ka Commonwealth Parliamentary Association (CPA), India Region, Zone III kaba ar sngi hanongbah Shillong mynta ka sngi.
Ha ka jingai jingkren jong u, u Om Birla u la kren shaphang ki jingnoh synniang jong u Lamphang ka iing dorbar thawain Lok Sabha bad u Myntri Rangbah ka jylla Meghalaya ba mynshuwa, u PA Sangma.
“Ki jingnoh synniang u PA Sangma bam kwai ha dwar u Blei ban ai ia ka lynti ba thymmai ha ki rukom treikam ka parliament bad ka synsharpaidbah ki dei ki ban nehshirta.”
U Birla u la ong ba ka CPA, Zone III, Northeast ka dei ka rynsan na ka bynta ki delegate ban iakren shaphang ki jingeh ha ka thain bad ban wad ia ki jingpynbeit ia kine.
Ha kine ki ar sngi, kine ki bynta jong kane ka jingialang kin iakren shaphang ki lad pyniasoh ha ka thain, ki jingjialynshopki bor ka mariang bad ki lad ban pynbeitia kine.
“Ngi la iohi ia ka jingkylla ka suinbneng ha kylleng ka pyrthei bad khnang ban pynbeit ia ki jingeh kiba mih na ka jingkylla ka suinbneng, kin don ki jingiakren ban pynbeit ia kine ki jingeh, kiba mih na ki kam jong ki briew, bad ka mariang,”
U la ong da kaba bynrap ba ka jingpynbeit ia ki jingeh kiba mih na ki jingjialynshop ka mariang, ki rukom ban kyntiew ia ki lad pyniasoh ha ka thain shateilammihngi, ka ioh ka kot bad ka jingwanrah ia ka jingryntih bad ka mariang da kaba pynthikna ia ka roi ka par ki dei ki kam kiba donkam bha.
Ki jylla ka thain shateilammihngi ki la sdang ban iohi ia ki rukom treikam ha kiwei kiwei ki ri na ka bynta ka roi ka par bad ruh ia ki thong sustainable development goal (SDG) bad mynta ki don ha ka lynti jong ka roi ka par.
Kane ka jingialang kanpynkhreh ia ka rukom iaidshakhmat, la ong u Lamphangka iing dorbar thawain LokSabha. U la iarohia ka jingstet jong ka roi ka par ha ka thain shateilammihngi hapoh ka jingialam jong u Myntri Rangbah Duh, u Narendra Modi.
U Birla u la ong ruh ba ka rukom im ha India ka dei kaba iajan bad ka mariang bad kumta, ka roi ka par kam dei ban ktah ia ka mariang.
Ha ka jingkren halor ka phang, ki lad pyniasoh ha ka thain ban pyniaryngkat ia ka thain shateilammihngi bad kiwei kiwei ki bynta ka India, u Birla u la ong ba ka thain shateilammihngi ka don ia ki lad ha ka ioh ka kot ban iaryngkat bad kiwei kiwei ki bynta ka India. Na ka bynta kane, ka jingkyntiew ia ki jingdon jingem ka long kaba donkam.
Ha kaba iadei bad kane, u la kren shaphang katto katne tylli ki projek kum ka PM Gati Shakti, ka jingpyniar ia ki surok bah ha ka thain shateilammihngi, ka jingkyntiew ia ka jingdon ki kad liengsuin ba treikam hapoh ka skhim UDAN bad ki jingkiew shaphrang ha ki kam telecom, ki lad ka leit ka wan lyngba ki jaka shongum, ki khlawkyntang, ki industrial park bad kiwei kiwei.
U Birla u la ong ba ka Zone-III jong ka CPA India Region ka dei kaba treikam bha hapdeng ki saw tylli ki zone. Ki 20 tylli ki convention ba man u snem ba la long haduh mynta ki pyni ia ka jingieng skhem ha ki jingngeit jong ka synsharpaidbah hapoh ka iing dorbar thawain, la ong u Birla.
U la kren shaphang ka jinglong kyrpang jong ki iing dorbar thawain jong ka thain shateilammihngi ha kaba u la ong ba ki don ki jingiakren ba shongkor ha kine ki iing dorbar thaw ain khlem da don kinokino ki jingpynthut. Kumta, ki mih ki jingpynbeit kiba skhem na kine ki jingiakren kiba wanrah jingmyntoi ia ka thain bad ka ri bad kane ka dei ka nuksa ia kiwei kiwei ki zone.
Ha ka jingiakren bad ki lad pathai khubor ha nongbahShillong shaphang ki jinglong jingman ha Manipur, u Om Birla u la kyrpad ban don ka shongsukshongsain. “ Kashongsukshongsain ka dei ka lynti sha ka roi ka par. Nga kyrpad ba kan don ka shongsukshongsain ha ka thain shateilammihngi,” u la ong
Ka jingialang kaba 20 jong ka CPA, India Region, Zone III ka dang long mynta ha ka iing dorbar thawain jong ka Meghalaya ha Rilbong, Shillong. U Myntri Rangbah ka Meghalaya, u Conrad K. Sangma, u Deputy Chairman ka Rajya Sabha u Harivansh Narayan Singh.
U Lamphang ka iing dorbar thaw ain jong ka Meghalaya, u Thomas A. Sangma, u Lamphang ka iing dorbar thaw ain jong ka Arunachal Pradesh bad u Chairman ka CPA India Region, Zone III, uPasang D. Sonaki la iadon lang ha kane ka sngi.
Ha kane ka jingialang ba ar sngi kin don ki jingiakren shaphang ki artylli ki phang kiba kongsan – Ki jingjialynshop ka mariang bad ki rukom treikam da kaba peit bniah ia ka thain shateilammihngi bad ki lad jingiasoh ban kyntiew ia ka thain shateilammihngi ban iaryngkat bad kiwei kiwei ki bynta jong ka ri.
Ha ka prokram pynkut ka ban long ha ka 30 tarik u Naitung yn ai jingkren da u Lat ka jylla Meghalaya, u Phagu Chauhan bad kan don ruh ka prokram ban pyni ia ka deiriti ha ka por janmiet.
