Shillong, Naitung 30: ka jingialang kaba ar sngi jong kaba 20th jong ka Commonwealth Parliamentary Association, India Region Zone III, kaba la long ha iing dorbar thawain ka jylla Meghalaya kala kut mynta ka sngi ha kaba u Lat ka jylla u Phagu Chauhan long u kongsan.
Haba kren ha ka jingpynkut ia ka jingialang jong ka CPA la ong ba ia kane ka kynhun Commonwealth la sdang ha u snem 1911 da kaba thmu ban kyntiew ia ka jingtip ha ka riti synshar, ka jingpyniaid ia ki kam hapoh ka iing dorbar, ka ioh ka kot, ka imlang sahlang bad ka riti dustur ha ka synshar paidbah khamtam ia ki ri kiba hap hpoh ka jingpeit ka ri Bilat.
U la ong ba u sngewthuh ba kane ka jingiakren kaba ar sngi hapoh kane ka jingialang ka CPA, ka long halor ka jingpynjot ka mariang, ka jingpyniasoh ia ka leit ka wan ha kane ka thian shatei lam mih ngi jong ka Ri India ba kan ia ryngkat kyrdan bad kiwei ki bynta jong ka Ri India.
Kumba ka long kane ka thain shatei lam mih ngi ka Ri India ka shah ktah bah ha ka jingshlei um, jingtwa khydnew, jumai, kine ki ktah bha ia ka ioh ka kot jong ki briew kane ka thian, ka jingbymbiang ki lynti syngkieng, kum ka surok, lynti rel, kad liengsuin, bymbiang ki Mobile Network, kine ki long ki jingkhang lad ban kyntiew iaka ioh ka kot.
Khmih lynti ba lyngba kane ka jingialang kaba ar sngi kan iarap ban kyntiew ia kane ka thain, ia ka jingialang kaba ar la pyniaid da u lamphang ka iing dorbar thawain ka jylla Arunachal Pradesh U Pasang D Sona, don lang u lamphang k iing dorbar thawain ka jylla Meghalaya u Thomas A Sangma, u symbut lamphang u Timothy D. Shira, ha ka jingdon lang ki dkhot jong ki iing dorbar thawain ne kine ki jylla shatei lam mih ngi ka Ri India.
