New Delhi, Risaw 01: Ka Central Reserve Police Force ha ka jingiatreilang bad ka tnat Women and Child Development kan pynlong ia ka jingniahthukthuk sha kylleng ka ri bad ka “Yashaswini” ka kynhun ki nongniahthukthuk ban rakhe ia ka bor ki longkmie ne ka Nari Shakti jong ka ri.
Ha ka 3 tarik u Nailur, 150 ngut ki longkmie kiba long ki ophisar ka CRPF, ia kiba yn phiah ha 3 tylli ki kynhun kin mih na ka bynta kane ka jingniahthukthuk sha kylleng ka ri. Da kaba niah ia ki thukthuk 75 Royal Enfield (350cc), kine ki kynhun kin sdang ia kane ka jingniahthukthuk na ka thain Shatei (Srinagar), Mihngi (Shillong) bad phangShathie (Kanyakumari) jong ka India.
Kin ia poi lang ha kajuh ka jaka ha u Statue of Unity ha Ekta Nagar (Kevadia), Gujarat ha ka 31 tarik u Nailur, 2023. Kane ka jingniahthukthuk ka dei kaba kumba 10,000 km ka ban iaid lyngba 15 tylli ki Jylla bad 2 tylli ki Union Territory.
Ha kane ka jingiaid lynti, la pynkhreh ia ki prokram bapher bapher ha ki distrik ba ki iaid lyngba kiba kynthup ia ki jingiakren bad ki briew kiba iadei bad ka “BetiBachaoBetiPadhao” (BBBP) kum ki khynnah skul bad ki samla kynthei kiba leitkolej, ki SHG jong ki longkmie
Ki cadet jong ka NCC, ki khun jong ki CCI, ki dkhot NYKS, ki samla shynrang bad kynthei, ki nongtrei anganwadi bad kiwei kiwei bad yn don ruh ka jingpynkup burom ia ki BBBP Champion.
Ha ryngkat ka jingkyntiew ia ka khubor “Desh Ke Hum Hain Rakshak” jong kane ka kynhun, kine ki longkmie ba niahthukthuk ki wanrah ruh ia ka khubor jong ka “BetiBachaoBetiPadhao” ha kane ka jingiaid lynti jong ki. Kin pyni ia ka logo BBBP ha ki jain bad ki banner jong ki kum ka dak jong ka jingkyrshan jong ki ia kane.
