Shillog, Kyllalyngot 13: Ka Directorate of School Education and Literacy, Meghalaya ha ka jingiatrei lang ryngkat bad ka Aga Khan Academy Hyderabad, kila pynlong ia ka Talent Identification Programme ia kaba la sdang naduh u snem 2022 ban wad ia ki khynnah kiba stad na ka jylla Meghalaya bad ba kin ioh ia ka bai bam ne scholarship ka ban kynthup ia ka jingpule naduh ka klass VI haduh klass XII.
Na ka liang jong ka Aga Khan Academy Hyderabad kala sdang ia kane ka programme naduh usnem 2022 bad ha kane ka snem la ioh ban jied kumba saw ngut ki khynnah bad ha kane ka kynti ba mynta jong u snem 2024-2025 la ioh ban jied biang bad baroh lah long phra ngut napoh ka jylla Meghalaya.
Kine ki khynnah kiba la shah jied ha ka Aga Khan Academy Hyderabad, hadien ka jingwad bniah ba kynsai bha kin ioh ia ka bai bam kaba long haduh shi klur marwei haduh ba kin da pyndep iaka jingpule ha ka kyrdan klass XII.
Ka jingwad bniah ia kine ki khynnah kadei na kylleng ki District jong ka jylla bad kiba la shah jied ha ka Aga Khan Academy, Hyderabad ki kynthup na Nongstoin, West Khasi Hills District, Jowai West Jaintia Hills District bad kumjuh ruh na Shillong East Khasi Hills District.
Haba kren bad ki lad pathai khuor u Arjun Puri uba dei u Dean jong ka Aga Khan Academy, Hyderabad ha kaba nyngkong u la pynpaw ka jingsngew nguh ia ka sorkar jylla bad khamtam eh ia u Chief Secretary ka jylla u Bah DP Wahlang bad kumjuh ruh ia u Swapnil Tambe uba dei u State Project Director, Samagra & Director of School Education Literacy, Meghalaya Shillong kiba la ai ka jingkyrshan ba pura.
Shuh shuh u Arjun Puri u la pynpaw ba ka jingioh rung kine ki khynnah sha kane ka Academy ka long ban wanrah ka jingkylla ha ka jingpule ka jong ki bad kim shym la donkam ban lut pisa namar ba ka Aga Khan Academy kan pynbiang ia ka bai bam ba kot haduh shi klur ia u wei u khynnah.
Ha shwa jong kane u Arjun Puri u la pyntip ba ka Aga Khan Academy kala ia soi da ka Memorandum of Understanding (MoU) bad ka sorkar Meghalaya bad na ka liang ka tnad Pule Puthi kala ia trei lang bad baroh ki skul ban jied ia ki khynnah ba kin bteng ia ka jingpule naduh ka klass VI haduh klass XII.
Ha kaba iadei bad ka jinglut jingsep ha ka leit ka wan, u Arjun Puri u la pyntip ba baroh ki jinglut jingsep yn bei tyngka da ka Academy ba kynthup naduh ka bai shong plane, ka bai bnai ia ki khynnah bad kine ki khynnah pule kin ioh ruh ia ka lad ban wan iing ar sien ha ka shi snem.
Na ka liang u Swapnil Tambe uba dei u State Project Director, Samagra & Director of School Education Literacy, Meghalaya Shillong haba kren u la ong ba kane kadei ka wat kaba ar ba ka Academy ka wan ban wad bniah ia ki khynnah pule kiba stad bad ba shemphang bad kine ki phra ngut ki khynnah kin mih lashai ka sngi ban leit sha Aga Khan Academy.
Shuh shuh u Swapnil u la iathuh ba kin dang iai bteng ia kane ka jingiater haduh ki sngi ki ban dang wan bad ka sorkar jylla kan kyrshan ia kane ka jingthmu jong kane ka Academy.
