Shillong, Iaiong 28:Ka Khasi Students’Union Bangalore Unit ka la pynlong ia ka 2nd Meghalaya Freshers’ Meet cum Cultural Program ha ka sngi Saitjain mynta u bnai ha JSS Campus, Indian Institute of Nursing, Bangalore.
Ha ka jingialang ba la pyniaid da ka samla Sweety Syiemlieh la wan ia shim bynta shitrhem da ki samla pule Khasi na kylleng ka jylla Karnataka. U kongsan ha kane ka sngi u long u samla Donald V Thabah, General Secretary KSU CEC bad u symbud kongsan u dei u samla Biangbor Lyngdoh Paliar, Organising Secretary KSU CEC.
Ha ka jingiakynduh lang la ioh jingkren na kine ki ar ngut bad na ka kong Elizabeth Nongbri, kaba dei ka long longkmie Khasi ba treimon sngewbha ha Bangalore. La ioh jingkren ruh na u samla Pynkmenlang Sanmiet, President KSU NEHU Unit, samla Rymphang Nongsiej, President KSU Bangalore Unit bad u sama Emosjohn Nongsiej, General Secretary KSU Bangalore Unit.
Baroh ki nongkren ki la ai mynsiem ia ki samla pule Khasi ha Bangalore ba kin long kiba adkar ha ka iaid ka ieng, ba kin minot thop ha ki jingpule ki jong ki khnang ban wanrah burom ia ka iing ka sem, ka Jaidbynriew bad ialade shimet ruh kumjuh. Ki la kyntu kynpham ruh ia baroh ki Khasi ha Bangalore ba kin long kiba ia tylli bad kiba kloi ban iarap para Khasi ha kano kano ka khep.
Shuh shuh ki la kren ruh ia ka jinglong kyrpang jong ka Jaidbynriew ha ka liang riti ka dustur, ka ktien ka thylliej bad ka mynnor jong ka Jaidbynriew kaba ai ia ka snap kaba kyrpang ia ki Khasi.
Ki la sneng ruh halor ka jingdonkam ban pynduh noh ia ka jingiasngew pher thain bad niam para Khasi bad ban sngew kawei kum ki khynriam, ki pnar, ki bhoi, ki war, ki maram, ki lyngngam bad ki diko kiba pynlong ia kawei ka Jaidbynriew Khasi kaba iar.
Ka KSU Bangalore Unit ka la pynkup burom ruh ia ka samla Bamelari Lyngdoh kaba la ioh ia ka khusnam Gold Medallist ha ka Master of Social Work na ka Alva College Moodbidri, Mangalore University.
Ka KSU ka la ai khublei ruh ia u samla Iada Martin Marbaniang, u ba la pyndep ia ka exam IPS na ka jylla Karnataka. Une u samla u dei u Khasi uba nyngkong ban ioh ia katei ka kyrdan na Bangalore bad mynta u la trei kum u Superintendent of Police ha kane ka jylla.
Ha ka juh ka por ki nongialam ka KSU CEC ki la pyntip ba ki la buddien halor ka jingdawa jong ka KSU Bangalore Unit ban tei noh ia ka Meghalaya House ha Bangalore na ka sorkar Meghalaya ha u bnai Jymmang 2018 ha kaba u Myntri Rangbah ka jylla Meghalaya u la pynbna ba ka jingshna ia katei ka iing kan urlong ha u Risaw 2018.
Ha ka jingbuddien ka seng la ioh jingtip na u ma Coming One Ymbon ba la ithuh bad jied ia jaka ban shna ia katei ka iing ha khapsor Bangalore bas ka donkam satang ban mynjur u myntri rangbah ia katei ka jaka.
Ka Meghalaya House ha Bangalore kan iarap shibun ia ki Khasi ha Bangalore lada ki ba haiing ki donkam ban wan ia kynduh ia ki. Kumjuh ruh kan iarap ia kito ki paradoh parasnam kiba thmu ban wad jaka pule ne trei ne kino kino ki kam ha kane ka sorbah.
