Shillong, Jylliew 16: Ki ar tylli ki sengbhalang na Ri lum jaintia ka JSU&JYF ki pynpaw ia ka jingiaroh ia u Ma Marki Mulieh MDC ka Jowai North, uba la ieng skhem kum u nongmih khmat jong ki paitbah ban pyrshah ia ka jingpynlong public hearing ka MSPCB na ka bynta ka Star Cement Company CMCL myn ha ka sngi 12th-06-2014.
Une u nongmihkhmat paitbah ba don ka jingkit khlieh na ka bynta ka iap ka im jong ka Ri bad ka Jaitbynriew, da ka jingthoh u la phah sha u Myntri Rangbah ka Jylla ban pynpaw ia ka jingbym pdiang jong u ia ka public hearing jong ka Star Cement CMCL na ka bynta ban pynheh ia ka par tih mawshun ha ki ar jaka kiba don ia ka jingheh ym duna ia ka 9.66 HA bad 13.58 HA, kumjuh ka Topcem Cement MCL kaba don ia ka jaka
kaba heh haduh 33.45 HA.
Katkum ka jingthoh ba mih ha ki lat pathai ba na ka liang jong u Ma Marki Mulieh MDC jong ka Jowai North u dawa ia ka jingpynshai na u Myntri Rangbah ba kumno ka sorkar ka lah ban ai wai ia ki jaka jong ki riew shimet ban pyndonkam sha kine ki kharkhana pynmih dewbilat jong ki bar jylla kaba long kawei na ki jingpynkhein ia ka Transfer of Land regulation Act 1971.
Na ka liang jong ki ar Seng ki ai ka jingiaroh kaba khraw ia u ne u MDC ba dang thymmai jong ka JHADC uba la pynpaw ia ka jingkit khlieh na ka bynta ka kam ba ki paitbah ki la bynshet ha u kum u nongia sait na ka bynta ka hok bad ka khyndew ka shyiap jong ki trai ri trai muluk kiba don sha kine ki thain ba don kine ki kharkhana pynmih dew bilat jong ki bar jylla, kiba la pynsyllen lut ia ki khlaw ki btap bad pynjot lut ia baroh ki Um ki wah kiba don ha sawdong ka ne ka thain, ha ka ba wat ban pyndonkam ruh ym long shuh na mar ka jingkylla rong bad kylla bih kat haduh ba la iap lut ki dohkha doh pnat ong kitei ki nongialam jong ki ar seng samla P.L Majaw president JYF bad samla R.N Parien President JSU.(SP News)
