Shillong, Lber 04: Ka Western Youth Welfare Organisation (WYWO) sengkmie lyngba u President Bah AM Shadap ka ai khublei kitbok kitwriang ia baroh ki samla pule ki ban iakhun ia ki eksam bapher bapher kum ka SSLC, HSSLC, CBSE, degree bad kiwei kiwei ba kin ioh ia ka met kaba koit ba khiah ba kin lah ban leh bha ha ki eksam ki jongki.
Ha kajuh ka por, ula kyntu ia ki samla pule baroh ba kin iai minot bad pynleit jingmut ha ki jingpule ha kum kane ka por ban ialeh ia ka eksam khnang ba kin ioh ia ka jingjop bad ban wanrah ia ka nam ka burom ym tang ia ka iing ka sem hynrei ia ka jylla bad ka jaidbynriew hi baroh kawei. Ha kum kane ka por ki samla ki dei ruh ban kynmaw ia ka ktien kaba ong, “U Blei u iarap ia kito kiba iarap ia lade” kumta ki dei ban pynshitom ia lade ban minot ha ka jingpule khnang ba kin ym babe kylla hadien da la ioh resod.(SP News)
