Shillong, Naiwieng 24: Kum u longsan mansan jong ka Seng Khasi Kmie kaba ha Mawkhar, Shillon, u bah Don Kupar Dkhar president ka Seng Khasi seng kmie pynpaw ïa ka jingsngewkmen kaba khraw ba ka Pomblang bad Shad Nongkrem jong ka Hima Khyrim.
Kaba don ha ryngkat ka niam-ki rukom, ki riti-ki dustur, ka nguh-ka dem ha U Blei Trai Kynrad, U Nongbuh-Nongthaw, ha madan shad kaba ha phyllaw ïing Sad, kaba ha Smit, Khyrim Syiemship, yn pynkut noh ïa ka ha ka 25 tarik, u Naiwieng, 2020 bad ha kane ka khyllipmat.
“Nga ai ïa ka jingïaroh bad khublei kyrpang ïa u Syiem bad ïa ka Hima Khyrim hi baroh kawei ïa ka jinglah ka jong ki ban pynlong ïa kane ka shad Nongkrem kaba kyntang bad kaba kongsan eh, wat hapdeng kane ka saw-ka sian na ka jingwan lyngshop jong ka khlam-ka ngoh ha kane ka por ha kaba kane ka tyrlep-tyrbun ka la saphriang bad lyngshop ym tang ha kane ka meirilum-meirisan baieit ka jong ngi hynrei, ha satlak kane ka snieh pyrthei”.
Ha kane ka bynta, “nga ai ruh ka kyrkhu-kyrdoh, ka duwai-ka phirat ryngkat ka kyrpad-kyrpon ha U Blei Trai Kynrad najrong-hatbian ba kane ka Shad Nongkrem bad ki jingpyndep ïa ki bynta jong ka niam-ki rukom kan long kaba ïaid beit, ïaid ryntih, kaba phuh ba phieng bad kaba jop bad ba u khun bynriew ka bri u Hynñiewtrep-Hynñiewskum un ïoh ka koit, ka khiah krat, khiah stang, ka im suk, im saiñ, im palei, tip briew-tip Blei ha ki sngi ki ïa kiban dang wan”.
