Shillong, Risaw 16: Ka Khasi Students’ Union lyngba ka Employment Monitoring Cell mynne ka sngi 16 tarik u Risaw, 2024 ka la ioh ban pynsngew ha khmat u Minister ka Arts bad Culture Department, Bah Paul Lyngdoh ia ka jingbakla na ka liang ka Personnel bad A.R Department ban pyntreikam ia ka roster, ha kaba ka post jong “Guitar Instructor” ha ka State Institute of Arts & Culture kan leit lut 100% sha ka Garo category.
Ha 14 tarik u Risaw, 2024 ka KSU ka la iakynduh ia u Cyril V.D. Diengdoh, IAS u ba bat kum u Secretary jong ka Personnel bad A.R Department halor kane ka mat hynrei kam shim lah hun satia ia ka jubab ba la ioh na une u ophisar u bym shim don ia kano kano ka jingkitkhlieh ba kan duh noh ka bhah jong ki Khasi Jaintia ha kane ka post. Hynrei la kren kyllaiñ bad pyni ia ki jingeh ban pynkylla ia kane ka kam ba ladep advertised.
Ka Seng ka ngeit skhem ba kine kiei kiei baroh ki jia namar ba ka Sorkar lyngba kane ka tnad jong ka Personnel bad A.R Department kam shim la pyntreikam ia ka roster katkum ki jingpynshai ba lah ai sha ka Seng bad sha ki paidbah ba ka roster kan iaid shakhmat khlem kylla dien hynrei ka long pynban da khongpong (retrospective).
Ka jingleh jong kane ka tnad kan pynduh noh ia ka bhah ba dei ban ioh ki Khasi haduh u snem 2040-2045. Na liang jong Bah Paul Lyngdoh, myntri ba dei peit ia kane ka Department I la kular ban shimkhia halor kane ka bynta.
