Shillong, Risaw 26: U Bah Manstudy Nongrem , Chairman jong ka KHADC bad u Bah Donevan Wanlang Deputy Chairman mynta ka sngi kila hiar shuki noh da kaba ai ia ka shithi hair shuki ha u Secretary jong ka Legislative u bah A Shangpliang.
Haba kren ha ki nongthoh khubor ha dien ba la dep ban ai ia ka shithi ienohkam u Bah Manstudy u la ong ba kane ka jinghiar shuki noh ka jong ki ka long ba kum ka party kala dep ban weng ia ka jingkyrshan ia ka EC jong u Bah PN Syiem, kumta ki sngew ba kim dei shuh ban dang don ha ka shuki.
Kawei ka daw ba kila ai ha ka shithi ienoh kam kine ki ar ngut ki MDC jong kaseng Congress ka long ba na kid aw jong ka jingkylla ha ka sain pyrthei hapoh jong ka KHADC bad ka jingshah kynnoh jong ka EC ba kala don kata ka jingpyndon kam bakla ia ka pisa jong ka Council kane ruh kala pynlong ia ki ba kin hiar shuki noh.
Haba ia dei bad ka jingtohkit halor ka jingkynnoh ba la pyndon kam bakla ia ka pisa hapoh jong ka Council ka long ba, lada u Bah Antonio War EM ba dei peit ia ka pla pisa u don ka jingkit khlieh u la dei ban hiar shuki noh, lane u CEM u la dei ban wengnoh ia u shipor katba ka jingtohkit ka dang iaid.
Haba la kylli hato kane ka jinghiar shuki jong ki baroh ar ngut ha ka juh ka sngi kan wanrah ne em ia ka jingeh ha ka Riti synshar, na ka liang jongu Bah Manstudy u la ong ba, ka AD Rule ka shah ia ki ban hiar shuki da kaba ai ia ka shithi hiar shuki sha u Secretary jong ka Legislative.
Kane ka jingjia mynta ka sngi hapoh jong ka KHADC kan long ka sien kaba nyngkong b aka iing dorbar kan long khlem ki nongpeit. Kum kane ka jingjia la ong ba kam pat juh jia koit naduh ba la wanrah ia ka District hapoh jong ka KHADC.
