Jowai, Naitung 03: Ki driver jong ka thain Sutnga area kiba la don kot don sla (permit) na u DTO ki pynlong ka jingialang mynta ka sngi 3–7–2014 ha shi kilo Sutnga road ryngkat ka jing iadon lang ki nongialam ka seng JYF EJH.
Ha kane ka jingialang ki driver jong kane ka thain kiba la ia don haduh 25/30 ngut ki iamih sha kane ka jingialang na ka bynta banpyrshah jur ia ki kali private ba kamai beain ki bym don kot don sla kiba biang ban iaknieh kamai bad ki na ka por sha ka por ong u samla Niwasly Rymbai President ka JYF-EJH.
Ha kane ka jingialang uwei na ki para driver u bah N. Lamurong u ong lada ai lad ia kine ki kali kamai beain bunsien ki juh shim kabu da kaba dain dor ia ki passenger na 30 tyngka uwei u passenger sha ka 200 lane 300 tyngka marwei bad lada ki passenger kim ai ia ki ha kata ka dor, ki shait pynshitom da kaba pynhiar shiteng lynti ia ki passenger bad u la ong ruh ba ka jingpyrshah jong ngi ia ki kali kamai beain ka long ban lait na ki jingma ba bunjait bad ki jingkulmar ki ban mih hadien habud lada ki bor ba dei khmih kim shim khia ban pynbeit noh kloi ia ka ne bynrap u tei u nongialam ka JYF-EJH.
Ha kane ka juh hi ka sngi tang shu kut ka jingialang kine ki driver ryngkat ka jingiasynran lang ki nongialam jong ka JYF EJH ki la leit ia kynduh ia ka Magistrate Smt. D. V. Lyngdoh ban kyrpad na ka ban leit khynra noh kham kloi ia kine ki kali kamai beain sha kane ka thain ban pynduh pyndam shi syndon ia ki, bad na ka liang jong ka
Magistrate Smt. D. V. Lyngdoh kala kular ban shim khia ia kane ka kam khnang ba kine ki driver kiba don kot don sla kin ioh ia la ka hok.
Kumjuh ruh na ka liang ka JYF EJH ka la kyntu ia ki paidbah jong kane ka thain ba kin iatrei lang bad kine ki driver bad ki bor jong ka ain kin lah ban wanrah ia ka jingjop.(SP News)
