Shillong, Iaiong 05: Hadien ba ka jingai por jong ki nonghikai SSA bad 4th teachers ia ka Sorkar Jylla ban pynurlong ia ki jingdawa ka la kut noh ha ka 31 tarik u Lber bad ba ka Sorkar Jylla ka snap jar jar, ka Synjuk jong ki nonghikai SSA bad 4th teachers hapoh la jylla, ka Meghalaya SSA School Association (MSSASA) Central Body ka la pynbna ia ka jingiakhih da kaba iaid paidbah ha nongbah Shillong ha ka 12 tarik mynta u bnai ka ban sdang naduh ka por 10 baje mynstep.
Ha ka kyrwoh kaba la phah da u Bah Aristotle C Rymbai u la ong ba ki la iaishah baroh shikatta, da ka jingkhmih lynti ba ka Sorkar MUA – II ba lam khmat da ka Congress hapoh ka jingialam u Myntri Rangbah ba donburom Dr. Mukul Sangma kan shim khia ia ki jingeh kiba ki nonghikai SSA bad 4th teachers ki iakynduh naka por sha kapor khamtam ha kaba iadei bad tulop thymmai bad Arrears jong ki 12481 ngut ki nonghikai SSA kaba ki dei ban ioh naduh u April 2016 katkum ka jingpynmih hukum da u Commissioner bad Secretary ka tnat pule puthi ka jylla uba long ruh u State Mission Director ka SEMAM ha ka 31 tarik Risaw, 2016 kaba haduh mynta ka Sorkar kam pat pyllait satia, ban pynkiew tulop ia ki 4th teachers kiba don 1521 ngut hapoh ka jylla.
Kane ka jingdawa jong ki nonghikai ka dei kaba la shu sah teng naduh u snem 2013 bad ban pynbiet ia ki kynrum kynram jong ka resol Diploma in Elementary Education (D.El.Ed) kaba la shu sah teng mynta lah tam shi snem, hynrei phewse ka Sorkar ka ialehkai pynban bad ka hok jong ngi ki nonghikai” bad ban pynbor ia ka Sorkar kaba la shu snap jar jar bad kyllud ngi la rai ban iaid shakhmat ia ka jingiakhih da ka jingiaiaid paidbah (Public Rally) ryngkat bad ki khun ki kti ha ka 12 tarik mynta u bnai ka ban sdang naduh na madan Jingkieng Nongtymmai bad iaid lyngba ka Fire Brigade, St.Edmund’s College, Dhankheti, Malki, Barik, IGP bad ngin pynkut ha Additional Secretariat, ong u bah Aristotle C. Rymbai President ka MSSASA Sengkmie.
Ha man la ki Assembly Session, ka sorkar ka kren shaphang ka jingnang jingstad kaba janai bad ki nonghikai kiba la pyntbit ha ka kam hikai, hynrei ka sorkar ka len pat ia ka bor jong ka jingnang jingstad kaba janai. La da kane ka sorkar ka don shisha ka jingkitkhlieh halor kane balei kam leh ei ei halor ka resol Diploma in Elementary Education (D.El.Ed) kaba ka la iateh soskular bad ka NIOS ha kaba 7822 ngut ki nonghikai kiba hikai ha ka kyrdan elementary ki shah ktah mynta na ka jingleh thurmur jong ka NIOS bad lano kan sdang pat ban phah training ia ki nonghikai kiba dang hap ban pyndep ia ka professional qualification (D.El.Ed) ne ka ap haduh ba ka Sorkar Pdeng kan da pynmih hukum ban weng kam ia ki , bynrap shuh shuh u bah A.C.Rymbai.
Hadien ka kaba ki la pynlong ia ka jingialum paidbah ha ka 17 tarik jong u bnai bala dep ha khmat ophis treikam ka Directorate of School Education and Literacy, u Myntri Rangbah Dr.Mukul Sangma ha ka 20 tarik u Lber u la jubab hapoh ka ing Durbar Thaw Ain ha ka Budget Session kaba dang shu kut shen ban pynkiew noh ia ka tulop jong baroh ki jait nonghikai hapoh ka jylla da 100 percent, kum kinonghikai ki pdiang ia kane, hynrei ki kwah ban shai kdar naduh u bnai bad u snem aiu kan treikam kata ka jingpynkiew tulop, katno yn pynkiew haba u Myntri Rangbah u ong 100 percent.
Ki Myntri ka tnat pule puthi kiba mynshwa bad mynta bad kumjuh ruh u Myntri Rangbah ki la pynkiew ia ka tulop jong kiwei pat ki jait nonghikai ha u snem 2013 bad 2016 hynrei ia ki 1521 ngut ki 4th teachers kiba hikai ha ki SSA Upper Primary School la shu ieh beit ha ka jingsiew kaba tang 6000 hajar tyngka shi bnai naduh u snem 2013 haduh mynta, balei kine ki 1521 kim dei ki nonghikai, balei ka Sorkar ka shu kut tang ha ki jingkular ban pynkiew noh ia ka tulop jong ki kumba la leh ia kiwei pat hynrei shu heh tang ka kular ka kam pat ym iohi haduh mynta, buh jingkylli u General Secretary ka MSSASA Sengkmie bah H.M.Marbaniang.
