Shillong, Naiwieng 29: Mynta ka sngi u bah Ialamphrang Lyngdoh bad u bah Gerald Samuel Duia kila iathuh ba kila ujor da ka ejahar pyrshah ia ka NH Consultancy private Ltd kaba don ha Demseiniong namar kala pyndon kam ia ka kyrteng jong ki wat la kim shym la leit ban shimti ia ka kam.
Haba kren ha ki lad pathai khubor mynta ka sngi ha Shillong Press Club, u Bah Duia u la iathuh ba ha u snem 2018 u la ioh ia ka phone ba ka don ka kompeni NH Consultancy private Ltd na Delhi kaba tyrwa kam lyngba jong ka Meghalaya State Skill Development Society ban ai jinghikai ha ki lai tylli ki bynta ka, Malti Coisine Chef, River rafting quide cum life guard level four bad Trekking Guide Cum Camp Director.
U bah Duia u la ong ba kila applai ia ka kam River rafting quide cum life guard level four, hynrei kim shym la leit ban shimti ia katei ka kam namar ka dei halor ka tulop, ia u la tyrwa T.30000/- shi bnai katba ia u Ialamphrang Lyngdoh la tyrwa T.25000/- ka juh ka kam ba kin trei. Dei halor kane ba ki khlem leit shimti ban trei ia ka kam.
Kaba pylyngoh ia ki ka long ba kila ioh jingtip ba ia ka kyrteng jong ki la phah da katei ka kompeni sha ka sorkar, haba kila ioh ia ka jingtip kila leit ban pan jingtip na ka Meghalaya State Skill Development Society bad la shem ba ka kyrteng jong ki ka don, hynrei ka jingsoi kyrteng pat kam ia dei.
Dei halor jong kane ba kila ai ia ka jingujor sha ki pulit, U bah Duia u la ong ba u la ujor sha Sardar Police Station bad u bah Ialamphrang Lyngdoh u la ujor sha Rynjah Police Station. Hynrei kaba sngew phylla ka long ba ki pulit jong ka Rynjah ki kwah ban pynkut ia ka jingtohkit ha kaba ia dei bad u Bah Lyngdoh katba ka phang ba ki ujor ka dei ka juh. La iathuh ba ia ka ejahar kila ai ha ka 13 Lber 2019.
La iathuh ba u briew u ba kila ia kynduh ban ia kren halor kine ki kam u dei u Rajendra Singh Yadev Director project. Na ka liang jong ki kwah ban shai ba kim shym la pdiang ia kano kano ka shithi thung kam da katei ka kompnei.
