Jowai, Jylliew 01: Ka AJYWO Sengkmie ka pynpaw ia ka jingsngewkhia kaba jur haduh katta katta halor ka jingpynslem shuh shuh jong ka NGT ban bishar noh wut wut ia ka kam tih bad shalan dewiong ha ka jylla Meghalaya kaba la ktah haduh katta katta ia u paidbah jong ka jylla Meghalaya u ba im jakpoh ia lade da kaba tih, bylla bad khaii dewiong.
“Ha ka jingshisha ki paidbah jong ka jylla ki la ap khmih lynti bha baroh ba ha kane ka 2 tarik mynta u bnai da kaba iai ap kyrmen ba ka NGT kan sngew synei ia ki lak ngut ki paidbah jong ka jylla Meghalaya ki ba im jakpoh ia la de da kaba tih, bylla bad khaii dewiong hynrei kane kam shym la urlong satia kat kum ka jingkhmih lynti jong ki”. Ong u Bah M H Dkhar, President jong ka AJYWO Sengkmie.
Ka AJYWO ka pynpaw ruh ia ka jingsngewdiaw ka bakhraw haduh katta katta na ka bynta ki phew phew hajar ngut ki nongshnong shnong jong ka Jaintia Hills khamtam kiba na East Jaintia Hills District namar ka jingiapthngan mynta ka ap ia ki na ka daw jong ka jingkhang tih bad shalan dewiong ba jyndat jong ka NGT. “Dang ha kine ki por kiba la dep, ki nongshong shnong jong ka Jaintia Hills ki iap na ka daw jong ka jingpang jingshitom. Ngim ju bna koit ba kin iap na ka daw jong ka jingshah thngan hynrei mynta pat de ka jingiap khlam kaba khraw ka ba ap ia ki, ka dei ka jingiap na ka daw jong ka jingshahtngan ka ban sa wan lynshop ia ka Jaintia Hills, khamtam eh ia ki nongshongshnong jong ka East Jaintia Hills bad kane kan ym slem shuh ban wan jia lada jia ba ka NGT kam pyllait shuh ia ka kam tih dewiong ha Jaintia Hills”, ong u Bah Dkhar.
“Ka ba i sangsot shuh shuh mynta ka long ba, da ki phew phew hajar ngut ki nongshnongshnong jong ka Jaintia Hills bad khamtam eh kiba na East Jaintia Hills, ki ba la ju im da ki phew phew snem haduh mynta da kaba tih, bylla bad khaii dewiong mynta shano kein kiba pli kin ia leit bad kumno kein kin ia im lada jia ba ka NGT kam pyllait shuh ia ka jingtih dewiong ha ka jylla namar ngi la iohi mynta ruh ba dang katno taiew eh ba ka NGT ka la khang ia ka jingtih bad shalan dewiong ha ka jylla, da ki phew hajar ngut ki nongshongshnong jong ka Jaintia Hills ki la ia kulmar jingmut haduh katta katta ban pyrkhat la ka ja kpoh bad na ka bynta ka ing ka sem,” ong shuh shuh u Bah M H Dkhar.
U Bah MH Dkhar u la ong shuh shuh ba ka ba kham shyrkhei shuh shuh ka long ba lada jia ba kane ka jingkhang ban tih bad shalan dewiong kan dang iaid bteng, ki jingsniew ba har rukom kin jyllei ha ka Jaintia Hills bad khamtam eh ha East Jaintia Hills namar ban ioh la ka jakpoh u briew un nym banse ban thom ia ka sang bad ynda kane kan jia, mano kein ban bah khlieh ia kane?
Ka AJYWO ka dawa na ka sorkar jylla ba ka dei ban shim khia bha ia kane ka jingkhang tih bad shalan dewiong jong ka NGT kaba la ktah ia ki lakh ki lakh ngut ki nongshong shnong ha ka jylla Meghalaya. “Ka seng ka kyntu ruh ia ki nongmihkhmat jong ngi, naduh ki MDC, ki MLA bad haduh ki MP ba kin klet noh ia ka kam politics bad ruh ka jingiasngew party ha kum kane ka por hynrei ban ia ieng tylli beit ha ka wei ka jingmut ban ieng iasaid bad ruh iada ia ka hok jong ngi kum ki paid riewlum lym kumta ka hok jong ka jaidbynriew rit paid jong ngi kan sa shah iuhroit bad ka jaidbynriew rit paid jong ngi kan sa duh sa dam noh ha kawei ka sngi”. (SP News)
