Shillong, Nohprah 20: Ka kong Amirda Nongkhlaw kala leit ban ujor sha ki pulit jong ka Mawdiangdiang out post ba ha ka step pherngap kumba lai baje mynstep ha ka 19 tarik mynta u bnai kala don ka jingia huri hura ha iing sah jong ki ha Umroh Mawkasiang.
Katkum ka jingujor ba la ai da ka kmie ka kong Nongkhlaw kala kynnoh ba u khun heh jong ka u Markarius Nongkhlaw u la pynhuri hura ha iing bad shoh bad dat ia ka kmie, haba iohi ia kane u khun rit jong ka u Sibius Nongkhlaw u la shoh ia u hynmen u Markarious bad ha kane ka jingiashoh u hynmen u la kyllon bad khlad noh.
Katba na ka liang jong ki pulit kila ong ba u wei u briew ba la tip kyrteng Severius Nongkhlaw u la dung iala u jong u hynmen u ba la tip kyrteng kum u Macarius Nongkhlaw ha ka shnong Umroh Mawkasiang kaba hap hapoh jong ka Mawdiangdiang out post, ia u ba mynsaw la pynkit sha NEIGRIHMS ban phah sumar.
Ha kawei pat ka jingjia ka trok kit dewiong kala kylla ha jan Ryndangbriew bad ha kane ka jingkylla kala leit ban ban ia kawei ka kali Chevrolet car bad ia ka scooty bad kine ki briew kiba don ha ka kali bad ka Scooty kila mynsaw. U ba shong ha ka Chevrolet la tip kyrteng kum u Satyam Prasad 17 snem bad u ba shong ha ka Scooty la tip kyrteng kum u Gyanendra Singh 60 snem.
Ia kine kiba mynsaw la pynkit sha Civil Hospital ban ioh jingsumar, hynrei ha kane ka jingjia u Satyam Prasad u la khlad noh hapoh Civil Hospital Shillong. U nongniah jong ka trok kaba don ia u number AS-01-BC-4337 u la phet noh ha dien jong kane ka jingjia.
