Shillong, Risaw 20: Ka jingpyntreikam ia ka Surok iaid kali manla ka sngi kynthup naduh Mawphlang ter ter shaduh Weiloi bad kaba dei ban pynpoi ia kiba donkam ban leit ban wan shaduh Balat bad Border Area Bangladesh kumjuh shaduh Mawkyrwat lem bad kiwei kiwei ki jaka la iohi ba la pyntreikam ha kaba yn wanrah ia ka jingbha bad jingmyntoi ia kiba bun ki paidbah kiba leit ba wan man la ka sngi.
Kane ka long kumjuh ruh ia ki paidbah kiba shong ba sah hapdeng jongkatei ka surok kynthup napdeng ki thaiñ Lyngiong, Tyrsad bad kiwei kiwei ki jaka kiba shong shnong ki paidbah.
Ynda haba la sdang ban pyntreikam ia kane ka surok kiba bun na ki paidbah kylleng sawdong kiba iaid na katei ka surok ki la kmen haba sakhi kumno ban iohi ia ka surok kaba bha kumba long lem kiwei kiwei.
Hynrei katba dang iaid ki sngi suki pa suki la iohi ia ka jingbha khyndiat hapdeng jongka surok kaba la wan mih hapdeng ki thaiñ pynnoh jongka Mawphlang hynrei haba phai pat shaki thaiñ Lyngiong, Tyrsad shaduh Weiloi.
Ki paidbah kiba iaid ba ieng napdeng jongkatei ka surok kynthup naduh Mawphlang, Mawsynram ter ter shaduh Balat bad Mawkyrwat lem bad kiwei kiwei ki jaka kiba kynthup lyngba jongkane ka surok ki la sah hapdeng ka umdum kaba la wanrah ka shaiong kaba khraw khamtam ki paidbah kiba iaid napdeng jongkatei ka surok.
Haba iohi ba mar shiteng na ka kam ban pynbha ia kane ka surok ka la dep lut baroh haduh ban wanrah ia ka jingsiang rong pura hynrei katba shiteng pat ympat dep tang khyndiat ruh ne wat ban siang rong ympat kot katkum ka plan haduh kat mynta kine ki sngi bad ban iohi ruh ba manla ka sngi haba iaid ba ieng napdeng kane ka surok la sakhi ba shiteng ka la bha bad shiteng ka dang sinew pura.
Ka surok kaba dang sniew la sakhi ba ka dang sah hapdeng ka jingbymdon nongtrei ban shimti hapdeng ka surok kaba jot ba pei bad ruh kumjuh ka la dang wanrah shuh shuh ia shibun ka jingjot jingpra jongka Surok hapdeng manla ka sngi kaba la pyntieng ban iaid kali bha ne wat ban kit nongpang napdeng ka surok sniew kaba la wanrah jingjot ia ki ba bun ki bynta.
Nakaliang jong I Bah Banshai Marbaniang, iba long u paidbah nongshong shnong jongka Jylla, ynda haba la ioh pdiang ia ka RTI napoh ka Tnat treikam jongka PWD (Roads) Mawphlang Division, la sakhi naduh ki bnai ba sdang jong une snem ba mynta 2024 ba la pyntreikam ha kaban pynbha ia kane ka surok iaid kali manla ka sngi kaba la kynthup lang lyngba ka Mawphlang Cart (MC) Road bad Mawphlang-Balat (MB) Road.
Kumba la shimti naduh Wah Umpatiah bad ban pynkut shaduh Weiloi katkum ka kilometre kaba jrong kumba la kheiñ lang baroh kalong kumba 28.90 Kilometre. Ka tnat treikam jongka Sorkar Jylla Meghalaya kaba dei khmih kumba la shimti lyngba ka tnat PWD (Roads) Mawphlang Division lashem ba la pyntreikam ia kane ka surok lyngba ka skhim “Improvement And Rehabilitation Of Pavement Including Widening To Intermediate Lane”.
Katkum ka RTI la sakhi ruh baka tnat treikam jongka PWD (Roads) Mawphlang Division ka la aiti sha ki arngut ki contractor kiba la shimti kynthup ia I Bah Bungsing Sohphoh bad I Kong Banalari Khongwir.
La aiti mar shiteng sha baroh arngut ki contractor ia ka kam ha kaban pynbha ia kane ka surok namar ka jingdonkam jongki paidbah ba iaid manla ka sngi ban pyntreikam bad kalong kumba 14.450 Kilometre marwei ha kaban pyniar ia ka surok bad ban siang rong pura khlem da pynbakla katkum ka Project Plan jongka Tnat treikam.
Katkum ka Pisa ba la mang ban pynbha ia kane ka Surok kala kot kumba Rs. 50 (Sanphew) Klur tyngka bad ia kane ka pisa ruh la sakhi ba ynhap ban phiah marshiteng sha baroh arngut ki contractor badei ban ioh.
Katkum ka Work Order ba la aiti sha baroh arngut ki contractor la iohi ba la aiti naduh u Bnai Kyllalyngkot (January) jong u snem 2023 ha kaban sdang ia ka kam bad kapor kaba dei ban pyndep kalong 24 bnai kumba la buh napoh ka tnat treikam jongka PWD (Roads) Mawphlang Division.
katkum kapor ba la mang ban pyndep noh baroh arliang ki bynta ba la phiah katkum ka Kilometre ba la buh kadei banlong ha u Bnai Kyllalyngkot (January) jong u Snem 2025. Hapdeng jongkatei ka surok ban pynbha la pynrung ruh ia ka Quality Coating katkum ka Bituminous Macadam.
Kane ka long ba dei ban siang kumba long kiwei kiwei ki surok ba neh skhem naduh na trai jongka surok kaba dei ban rung kumba 6 (Hynriew) bynta ka jingrben ban siang rong hapdeng ka surok haduh ban pynbha janai katkum ka Semi Dense Bituminous Concrete.
Nakaliang jong I Bah Banshai Marbaniang hadien ba la iohsngew ia kane ka bynta I la hiar ban leit jurip dalade bad la shem pura ba kalong kaba la wanrah ia ka jingeh hapdeng ki paidbah kiba leit ba wan nakatei ka surok namar ba mar shiteng naka kilometre ba la mang sha u Bah Bungsing Sohphoh iba long u contractor ba la shimti kumba 14.450 kilometre.
Kala bha lut baroh bad katto katne ki bynta hapdeng jongka surok ba bha la mih ruh kiba la pait la pra bad pei thliew malu mala bad la hap ban kyntu ia u contractor ba shimti ia kane ka bynta ban pynbha shuh shuh nalor kaba la dep baroh khlem da pynsah dien mong.
Ki bynta kiba dang kynthup ia ka surok kaba iaid na kajuh ka bynta bad dang sahkut hapdeng ka jingsniew kaba dang jot pura kadei kaba la shimti da ka Kong Banalari Khongwir kaba long ka contractor khlem pat da lah ban pynbha tang khyndiat ruh.
Nakaliang jong I Bah Banshai Marbaniang haba iohi ia kane ka bynta I la kyntu ia I Kong Banalari Khongwir ban shimkhia ia kane ka kam ha kaban pyndep noh mardor khlem da pynslem shuh kumba la buh lyngba ka Tnat treikam jongka PWD (Roads) Mawphlang Division.
Kala hap ruh ban pynsngew sha ka tnat jongka PWD (Roads) Mawphlang Division ba dei ban shimkhia ia kane ka bynta kaba dang sah bad ban kyntu ia ka Contractor lada imlah shuh ban pyndep katkum kapor ba la buh lyngba ka department idei ban pynphai noh ia ka Work order shapoh ka tnat treikam jongka PWD (Roads) Mawphlang Division bad ban aiti noh sha kiwei kiba lah ban pyndep khlem da kynran dien halor kane ka kam.
U Bah Banshai Marbaniang I hap ruh ban pynsngew ba lada i contractor imlah ban shimkhia da kaba iaid lait katkum ka bynta ba la buh lyngba ka department nakaliang jongka tnat treikam kadei ban wanrah ia ka Legal Action, Contract termination, Penalties katkum ki kyndon Aiñ ba la buh khlem da pynbakla katkum ba la paw hapdeng ka RTI Act 2005 kaba la ioh pdiang.
