Shillong, Nohprah 23: u Nongbishar jong ka KHADC u Bah S Kharsyiemlieh mynta ka sngi u la pynbam smai ia ki hynriew ngut ki MDC ba thymmai kiba la jop ia ka MDC election shiteng samoi kaba la long ha ka 13 tarik mynta u bnai ha kaba ia ka jingniew vote la pynlong ha ka 16 tarik mynta u bnai bad kine ki hynriew ngut ki la long ki nongjop.
Ka jingpynbam smai kala sdang na u Bah HS Shylla MDC jong ka Nongkrem, but sha u Bah Ricky Shullai jong ka MDC ka Laban-Mawprem, wan sha u Bah Samlin Malngiang MDC jong ka Nongspung –Sohiong, but sa u Bah Equador L Nongrang MDC jong ka Mairang-Nongkhlaw, u Bah Blandingstar Warjri MDC jong ka Pariong-Mawthadraishan bad u Bah Kimfa Sidney Marbaniang MDC jong ka Rambrai-Jyrngam.
Ha kane ka sngi la don lang ruh u Chairman ka KHADC u Bah LG Nongsiej, Secretary jong ka Legislative jong ka KHADC u Bah A Shangpliang, u CEM jong ka KHADC u Bah PN Syiem bad u nongialam ka liang pyrshah u Bah Manstudy Nongrem bad ryngkat ki MDC bad ki EM na baroh ar liang.
Ia ka jingpynbam smai la pynlong hapoh jong ka Conference Hall jong ka KHADC, ha kane ka sngi da ki spah ngut ki nongkyrshan jong kine ki MDC kiba dang shu jop kila ia poi ban skhi lang ia kane ka sngi sah kynmaw ban iohi ba u MDC uba la jied u la shim ia ka jingsmai ban long u MDC ba pura.
