Shillong Naitung 25: U bah Pynshngianlang Syiem u Deputy CEM ka Khasi Hills Autonomous District Council mynta ka sngi, u la ong ba EC ka la rai ban wanrah ia ka jingpynkylla ha ki ain kiba la don lypa khnang ban lah ban lap bad ban tehlakam ia ka jingrung khyrtlep ki briew ba nabar hapoh u pud u sam jong ka District Council.
Haba kren ha ki lat pathai khubor u bah Pynshngain haba kren sha ki lad pathai khubor, u la ong ba ia kane ka rai la shim hadien ba la iohi ba ka sorkar pdeng kam shym la leh eiei haba iadei bad ka jingdawa ban wanrah ia ka Inner Line Permit ha kane ka jylla.
La ong ba kumba ia tip ba ki Seng bhalang ki la iakhun ban ioh ia ka ILP ban iada ia ka jingrung jingmih ki briew ba nabar ha kane ka jylla. Hynrei kane haduh mynta ka dang sahteng ka jingdawa bad ka sorkar pdeng kam shym la leh eiei tad haduh mynta.
Katba ym pat lah ban pyntrei kam ia ka ILP na ka liang jong ka KHADC kila rai ba lyngba ki ain kiba la dep ban don lypa, kum ha ka Elaka Administration Act, ka KHADC Mylliem Appointment of Syiem Deputy Syiem Hima Maharam bad kiwei de ki Ain kiba la don lypa.
Ka KHADC kan wanrah ia ki jingpynthymmai ne ka jingpynkylla khnang ban don ia ka jingkhein ba biang ha ka rung ka mih ki briew ba nabar. Kane ka mut haba ki briew ki rung ha ka Raid ne Hima, kidei ban don ia ki kyndon kiba ki Hima ki hap ban treikam katkum ki Ain.
Haba rung ne shong ha shnong lada dei u nongtrei sorkar ne u nongtrei bylla, dei ban don ki rukom treikam ba u Rangbah dong bad u Rangbah shnong u hap ban pyndep katkum ki Ain bad ki kyndon jong ka KHADC.
