Shillong, Lber 14: katba dang mih ki sngi ka jingshah ban bein jong ki kynthei kala dang jur ha ka jylla baroh kawei, hynrei ka long kaba sngewlyngoh ba ki nongleh kam sniew ki lait suk na ka kti jong ka ain, bad na ka liang jong ki pulit ki long kiba peit ngor ban ia khun pyrshah ia ki kam lehnoh, hynrei haba poi sha ki kam die drugs bad ki kam sha leh beijot jong ki kynthei kim lah ban leh ba wat ia ka iing basa kaba la pyniaid da kiba ha iing jong u myntri kam poh iing la pyndon kam ia ka kum ka jaka die met, la kynnoh u Sainkupar Nongtraw ha ka jingpynlait khubor mynta ka sngi na ka seng beain HNLC.
Ka HNLC ka buh ka jingkylli kumno ia ka meghalaya house ha Delhi bad Kolkatta , la kynnoh ba kine ki iing jong ka sorkar ki long ki jaka shong pynngad jong ki kynthei jong ki MLA, ka seng ka ong ba kam ktah ban thad ia ka kyrteng jong ki ne ban pynbud nam ia ki, na ka liang jong u myntri kam poh iing u la dei banhiar shuki noh ban shim ia ka jingkit khlieh ban ai lad ia ka jingtoh kit kaba laitluid.
Haba ia dei bad ka seng Congress, ka seng HNLC ka kynnoh ba ka sorkar kala iaid ia ki MLA kiba la sah kynnoh, kum ia ka Ampareen Lyngdoh, ka Debora Marak bad bun kiwei, lada ka sorkar kam lah ban leh ei ei ia kine ki ba khraw kumno kan pynkloi ha kaba ai ka hok ha kaba ia dei bad ki paidbah, ka seng HNLC mynta kala pynkhi im biang ia ka Operation Kyllang ban ia khun pyrshah ia ki kam thombor pyrshah ia ki kynthei khynnah bad ka jingpynshitom kan long kaba eh bha.
Haba ia dei bad ki kam khaii drugs, ka seng ka ong ba kala iohi ia ka nongrim ba u myntri rangbah ka jylla u ieng ban kem ia ki nongshallan ia ki drugs, hynrei kaei kaba jia ha kine ki snem baroh kiba shah kem dei tang kiba rit baria, balei u myntri rangbah u la klet ba ka jingjyllei jong ka kyiad kala wanrah ia ka jingiap jong kiba bun ki briew kumba 25 haduh 45 ngut na ka jingdih buiad.
Ka HNLC ka ong ba u myntri rangbah u dei ban leit jongoh ia ki Hospital ban lap ba bun kine ki kam thombor pyrshah ia ki kynthei la leh ha pdeng ka jingbuaid kyiad bad ki samla mynta kila ngam bhor ha ka kyiad ban ia ki kam dih drugs namar ia ka jingiap la dei ha ki bilor ka ong ka seng HNLC. Kumba ka long wat ki nongmih khmat ki MLA ruh ki dih ia ki jingdih ia ka kyiad kaba rem dor.
Haba ia dei bad ka jingiarap kaba la ai sha ki briew kiba la duh ei ia la ka jong ka jingim na ka daw jong ka jingkylla kali, ka long kaei kaei kaba sngew pang met ban iohi ba ka sorkar jylla kala ai tang T.50 hajar ia kiba iap bad T.20 hajar ia kiba mynsaw ha ka jingkylla kali ha West Khasi Hills, katba ka sorkar pdeng kala ai T. 2 lak ia kiba iap bad T.50 hajar ia kiba mynsaw.
Haba ia dei bad ki nongkit kam thymmai jong ka seng KSU ka HNLC ka ai khublei ia ki, ha ka juhka por la ong ba ka seng HNLC kam pynrshah ia ki kam pynroi kum ia ka Lynti rel hynrei kaei kaba don kam ka long ban don ia ki jaka ba peit bniah ia ka rung ka mih jong ki briew kiba na bar, ka jingdon jong ka lynti rel kan iarap ha kaba pyniar ia ka dor ha ka kit ka bah, ka seng HNLC ka ong ba ka long kaba suk ia u myntri rangbah ban kren hynrei u dei ban pynurlong ia kine baroh , la ong u Bah Sainkupar Nongtraw Publicity Secretary ka seng HNLC, ha ka jingpynlait khubnor mynta ka sngi sha ki lad pathai khubor.
