Shillong, Nailar 24: Ki paitbah jong ka Ranikor Civil Sub Division South West Khasi Hills District ki la hap ban mad ia shibun ki jingeh na ka daw jongka jingthud ka network , ka jingbym biang ki tiar ki tar bad ka jingduna jongki nongtrei hapoh jongka SBI Ranikor Branch .
Ka KSU mynta ka sngi lyngba ki
dkhot jong ka KSU Ranikor Unit ki la leit ban jngoh ia kane ka tnad Bank jongka SBI bad ngi la lap ba ki paitbah ki la hap ban wan Ieng line naduh 7 baje mynstep tang ban wan sei pisa na bynta ban pynbiang ka jingdonkam jongki ha ing ha sem jongki watla iaka Bank la dei ban plie haduh 10 baje mynstep .
Kane ka dei kawei ka jingeh ba kum ki paitbah naduh ka thain Phlangdiloin, Photkroh ki mad bad bunsien la lap ba don ki khep ba ka network kam long bad kane ka la ktah bad pynthud iaka jingtreikam jongka Automated Teller Machine (ATM).
Haka jingwad bniah jongka seng ngi la lap ba bunsien ka don ka jingthud haka internet bad bunsien lei kam ju don. Ngi la lap ruh ba ka Token Machine hapoh kane ka Bank ka la duh naduh u bnai January hynrei ym shym la lah ban maramot haduh mynta bad ka printing machine ruh ka la duh naduh hashwa ka lockdown hynrei ia kane ruh khlem maramot haduh mynta.
Ka jingdon jongki nongtrei hapoh kane ka SBI Branch ruh dang Duna bha ban ianujor bad ka jingdon jongki Shnong bad ki paitbah nongshong Shnong naba ka dang don tang u Branch Manager bad 4 ngut kiwei ki nongtrei bad ngim don ka jingartatien ka jingduna nongtrei ruh ka dei kawei naki daw ba bankhia iaki paitbah ba wan donkam ha kane ka Bank. Ka Seng ka lap ruh ba bunsien ka don ka jingduna pisa hapoh kane ka Bank bad ka la pynlong ruh iaki paitbah ba ki hap leit phai ing thylli.
Kane ka jingdkoh haka jingtreikam jong kane ka Bank ka la ktah iaki nongshongshnong ka Ranikor Civil Sub Division namar bunsien ki ap ban Thep ne sei pisa nangne . Ki phew tylli ki Shnong naduh Phlangdiloin, Phlangmawprah bad kiwei kiwei ki ju wan sei pisa nangne ha ki jingtrei NREGS haki Shnong jongki bad ki hap ban iaid 3/4 kynta tang ban ioh sei pisa bad kumta ka buh jingeh iaki lada ki wan bad jia ba ki hap leit phai thylli.
Ka Seng haka jingshisha ka la iakynduh teng ia u Chairman jong ka Meghalaya Cooperative Apex Bank ban buh branch thymmai noh ha kane ka jaka bad mynta ngi kwah ban kyntu ba dei ban set up kham bun ki bank hapoh ka Ranikor Civil Sub Division khnang ba kan nym buh jingeh iaki paitbah .
Ka KSU ka kyntu ruh ia u Syiem jong ka Hima Maharam ban pyrkhat lem bad ban nym khanglad iaki company buh mobile tower hapoh ka thain namar ka jingbym biang ka network ka ktah nadong shadong iaki paitbah jongka dong ka thain. Ngi kyntu ia u Syiem ba un pyrkhat lem iala ki khun ki hajar ka hima khnang ba kin nym iakynduh jingeh ha kane ka liang naka por sha ka por.
Ka Seng ka sngewdei ban kyntu ruh ia u MLA bad MDC Ranikor Constituency bad kumjuh iaki bor district bad ki bor sorkar ba ki dei ban phai khmat lem sha ka jingduna jong kane ka SBI Branch ha Ranikor namar ka jingduna ha ka rukom treikam hapoh ka Bank ka la pynlong iaki paitbah ba kin hap ban ialum paitbah bad ka jingialum paitbah ruh ka long kaei kaei ka jingma khamtam ha kane ka por ba ka don ka jingjur jong ka khlam COVID-19 hapoh ka jylla . Kane ka dei ka kyrwoh na u samla Forwardman Nongrem President KSU South West Khasi Hills District
