Shillong, Nailur 19: Kum shi bynta ban pynlong ia ka jylla Meghalaya kum ka shlem ialehkai football ha ka ri India ka Northeast United Football Club ha ryngkat ka jingkyrshan ka sorkar jylla kan ioh ban seng ia ka Residential Football Academy ha Mawkhanu, New Shillong Township.
U Myntri Rangbah ka Jylla Conrad K Sangma mynta ka sngi ka 19 tarik u Nailur 2024 kum ka jingpdiang burom ïa ka kynhun ïalehkai ka Northeast United sha ka Jylla hadien ba jop ïa ka Durand Cup 2024 ula ong, da ka jingwan jong ka Residential Academy kan long ka jingmyntoi kaba khraw ïa ka jingialehkai phutbol ha ka Jylla baroh kawei.
Ha ba ioh ban ia kren bad ki nongthoh khubor u Myntri Rangbah ka Jylla u la pynpaw ba ngin pynlong ia bun ki prokram kynthup ïa ki prokram ha ki shnong ki thaw ban sei pyrthei ïa ki sap jong ki khynnah kiba dang rit ha ka rta bad ban kyntiew ïa ki, kumta bun kiei kiei kin sa jia bad ngi khmih lynti ba kan iaid shakhmat kane ka jingïatreilang.
Ha ka jingiakren bad ki nongialehkai, u Myntri Rangbah ka jylla ula ong, ba man la uwei pa uwei u nongialehkai ka Northeast United FC ki long ki khlur na ka bynta ki samla jong ka jylla Meghalaya.
U Myntri rangbah u la ong ruh ba da kaba iatreilang bad ngi ka jylla kam dei eh tang na ka bynta ka jingialehkai hynrei kadei na ka bynta ban wanrah ia ka jingkylla kaba ngin sa iohi naka bynta ki khynnah kiba kwah ban iohi ba kin phong iaka Jersey bad ban ialehkai naka bynta ka Northeast United bad lehse ban mihkhmat ia ka ri India ha kakyrdan kabaheh.
Kumban shu pynkynmaw ba haka14 tarik u Lber ka sorkar jylla kala iasoi iaka jingiatehkular bad ka Northeast United FC ban seng ia ka Residential Football Academy ha New Shillong bad ka sorkar kala mynjur ban ai ia ka jaka kaba 15 akar ia katei ka kynhun ialehkai.
Haba ai jingkren sha ki lad pathai khubor, na ka liang jong u CEO ka NorthEast United, u Mandar Tamhane, u la ïaroh ïa ka Sorkar jylla Meghalaya kaba don bynta ban kyrshan ïa ka klob ha kine ar samoi ba ladep, da kaba bynrap ba kadei kaei kaei kaba um pat ju ïohi ha kiwei pat ki jylla jong ka ri India.
U la ong ruh ba ngi sngew kmen ba ka Sorkar Meghalaya ka la ai ïa Ngi 15 acre ka jaka ha ki bynta jong ka Shillong ban seng ïa ka shlem ai jinghikai phutbol jong Ngi ha kane ka thaiñ.
U la pynpaw ruh ba ka klob ka ïatreilang syndah syndah bad ka tnad jngohkai pyrthei jong ka jylla Meghalaya (Tourism Department) ban kner lane ïarap sha ki district bapher bapher ban kyntiew ïa ka phutbol ha ki grassroot level.
