Shillong, Naitung 29: U Lamphang ka iing dorbar thawain ka jylla Arunachal Pradesh ba dei u shongknor jong ka Commonwealth Parliamentary Association(CPA) u Pasang D Sona, haba kren ha ka jingialang kaba 20th jong ka Zone III, la ong, ban pynioh ia ka Internet ha baroh ki shnong ha North East ka long kaba don kam tam ia mynta.
La ong ba mynta ka jingdon kam ia ka Internet ka long kaba ym lah ban shuh kiar, la ha ki kam ophis, ki bank, ka khaii pateng, ka pule puthi bad ka jingiadei paralok ruh kum juh don kam ia ka internet, kumba ka long mynta ka North East ka dang shem jingeh ha kane ka liang namar ka jingpynioh ia ka Internet ka dang duna.
Ha ka jingkren jong u lamphang ka jylla Arunachal Pradesh u la ther tyngeh ia kita ki National Media ba kim juh pyni ia ki jingjulor na ka Mariang ha North East, peit dang shen ka jingshlei um ha Delhi kila pyni jan baroh 24 kynta, katba ia ka North East em.
U la ong ba ia ka jingpynjot ka mariang yn nym lah ban pynsangeh, hynrei da ka jingiakren ym sa lah ban shim ia k lat ki lynti kumno ban pynduna ia ka jingduh lada wan ka jingpynjulaor ka mairiang, kane ka thain shatei lam mih ngi ka Ri India ka dei ka jaka ban shah ktah bha ha ka jingpynjulor ka mariang.
Ka phang ban iakren ha kane ka jingialang ka CPA, ka long halor ka jingpynjulor ia ka mariang, ka jingpyniasoh ia ka leit ka wan, lyngba ki surok, lyngba ki kad liengsuin, lyngba ki um ki wah bad ki lynti rel bad khmih lynti ia kaei kaba ki iakren mynta ka sorkar pdeng kan tip ia ka jingeh kane ka thain.
U Lamphang ka iing dorbar thawain ka jylla Meghalaya u la pynkynmaw ba ia ka CPA Indian Region Zone III la pynwan dur ha ka por ba u Purno A Sangma bam kwai ha dwar u blei u long u Lamphang ka iing dorbar Lok Sabha ha u snem 1996 bad ia ka jingialang kaba nyngkong la sdang ha u snem 1997 ha Kohima jylla Nagaland.
