Shillong, Jymmang 11: U myntri rangbah ka jylla u Dr Mukul Sangma u la ong ba ka cabinet mynta ka sngi kala pdiang ia ka rai ban thaw ia ka “ Meghalaya Piggery and Lives Stock Development Society” na ka bynta ban pynkhain ia ka jingpynmih doh nap oh ka jylla bad ka jingbei pisa na ka bynta kane ka kam ha ki san snem ban wan kan long haduh T.1088.97 klur tyngka.
Katkum ka jingkhein kaba la ai ka long ba ki nongrep baroh ha ka jylla kiban ioh ia kane ka jingiarap na ka sorkar kin long haduh 1,95,500 ngut ha baroh kawei ka jylla bad na ka bynta jong une u snem ki paidbah nongrep kiban ioh ia kane ka jingiarap kan 50000 ngut. Ha kane ka snem kaba nyngkong ka jingpynlut kan long T.217.00 klur tyngka.
U myntri rangbah u la ong ba ka jingdon kam ia ka doh ha kane ka jylla ka long kaba bun bah, kane ka skhim kaba ka sorkar kan pyntrei mynta kan long, khamtam eh ia kiba ri sniang, ka ri syiar bad ka ri masi. U myntri rangbah u la ong ba ka sorkar ka kwah ban iohi ba ka jylla ka dei ban pahuh ha ka jingpynmih ia ka noh na kane ka jylla.
Ia kane ka skhim yn sdang pyntrei kam mynta bad kan kut ha u snem 2022 kaba dei ka snem ba ka jylla kan sa rakhe ia ka jingdap 50 snem jong ka jingioh jylla ba pura. Ka sorkar ka kwah ban iohi ba ki paidbah kin kiew ha ka ioh ka kot ha baroh ki liang. Kum ba ka long mynta 70% na ki paidbah nongshong shnong ki dang shaniah ha ka rep.
