Jowai, Risaw 11: Da ka jingiatreilang jong ki paidbah ka sor Jowai, da ka jingiasngewthuh kumno ban iada na ka jingjaboh ka wah Myntdu, ha kaba ka sor Jowai ka ioh ia ka umdih na kane ka wah.
Ha ka Facebook, u Deputy Commissioner Jowai, u la thoh “ ngi la sa ngehnoh ia ka jingleh baroh shikatta ban ban pyngam ia ki dur blei ha ka wah Myntdu, hynrei la shna ia ka top um kba heh kaba 8 phut la 8 phut bad ka jingjylliew ka long 4 phut, bad ia ka jinglut na ka bynta kane la bei na ka ‘Chief Minister’s Youth for Green Campaign”.
Ki kali kit um jong ki pulit kila pyndap ia kane ka top um ha dien ba la pyndep ia ka jinglehniam da kaba shu byngem ia ki dur blei ha ka wah myntdu, la rah ia ki sha rud jong ka wah bad la pynngam pat ha kane ka top um, ia kine ki dur mot yn sa weng la shai da kaba pynlait ia kane ka um ha ka thliew kaba la tih kyrpang bad ia ki niut ki nier pat yn sa bret ha ka theh niut jong ka municipal.
Da kaba leh kumne kan nym pynjaboh ia ka wah, ha kaba ki paidbah nongshong shnong saw dong bad ka sor Jowai ka ioh ia ka umdih na kane ka wah, khlem sngap ia ka jingsngew jong ki katto katne ki briew . Kila don ki khynnah samla kiba la kum pynlait ia ka dur mot ha kane ka wah hynrei laioh biang ia ka bad la sei sha rud wah.
Ha kane ka jingpyngam ia ki dur blei, ymshym la shah ba wat tang u syntiew ruh u hap hapoh kane ka wah, u DC u la pynpaw ia ka jingsngewnguh ka jong u ia pulit bad ia ki briew jong ka Jowai Muncipal kiba la ia treilang ha kane ka bynta, ka jingsngew nguh ka leit ruh sha ka ki dkhot jong ka Sarbajan Puja Committee Jowai. Kyrmen ba kane kan iai beteng ha ki snem ban wan ruh.
