Shillong, Iaiong 23: Kum shi bynta ban rakhe iaka World Earth Day lane ka sngi Pyrthei, ka KSU Wapung Unit ka la shim iaka sienjam ban rakhe iakane ka sngi ka 22 tarik Ïaiong 2021ryngkat kylleng satlak ka pyrthei.
Ka KSU Wapung Unit lyngba kane ka sngi ka la pynlong da ka jingialang ai jinghikai iaki khynnah skul kiba don ha ka shnong Wapung ha kaba lah pynlong ha Moopynieñ Government LP School ha ryngkat ki khynnah skul.
Ha kane ka sngi la don lang ki nonghikai jong ki skul bapher bapher bad ruh ki Aganwadi Workers ki Asha, ki riew rangbah ki nong ialam shnong naduh u Ma Satly Ryngkhlem uba dei u Rangbah Shnong ka Shnong Wapung Skur, u Ma Happy Rymbai, u Ma Shatbha Ryngkhlem ba kiwei kiwei.
La ioh ka jingkren na ba bun ki Rangbah hakaba ki la pynpaw iaka jingsngew jong ki halor kane ka sngi. Ka bynta ban ai jinghikai lane kum u Resource Person la shim da u Ma Damewanhi Rymbai uba long u wei na ki Rangi jong ka dong Moopynieñ.
Haba ai jinghikai na ka liang jong u u la batai ba ka jingdon kam ban pynneh pynsah iaka mei mariang ka dei kaba kongsan tam. U la ong shuh shuh ba ki u briew hi mynta u ialeh ban wad jaka sha kawei pat ka pyrthei ban sah hynrei um sngewthuh bad um kyndit bynriew ba iakaba ngi sah mynta ngin hap ban pynbha.
U la pynpaw ruh ka jingsngew kmen ba lyngba kane ka sngi la ioh ban thung ruh iakine ki tynrai dieng ha kaba kin long ki jingthung ban iada naka jingjot ka mariang.
Ka KSU Wapung Unit lyngba jong kane ka sngi hadein ba lah dep ka jingialang ka la ioh ban thung haduh 60 tynrai ki dieng kiba bun jait ha baroh ki skul shnong ,ki iingmane shnong ,ki dorbar hall jong ki shnong baroh.
Ka KSU lyngba kane ka jingrakhe iakane ka World Earth Day ka kyrmen skhem ba kan long ka khubor ba bha sha kiwei pat khamtam haba iadei bad ka mei mariang bad ka KSU ka kyntu ruh iaki paid nongshong shnong jong ka shnong ba kin ri sumar iaki tynrai dieng ba la dep thung khnang ba kin long ki matti ba ki jingmyntoi ba bha iaki pateng ban wan.
