Shillong, Jymmang 18: Ka jingtei ia ka iing jong ka Legislative wing jong ka Khasi Hills Autonomous District Council kaba la mang T.4.74 klur ka lah ban kiew dor namar ha ka por jong ka Executive Committee jong u Bah Ardent Basaiawmoit kila pynsngeh ia kane ka jingtrei la kumba shisnem ei ei.
U Bah J Tynsong Executive Member ba dei peit ia ki kam shna iing jong ka KHADC haba kren ha u SP News Agency, u la ong ba wat la u kontraktor u ba pyntrei ia kane ka iing ym pat ong ei ei haduh mynta ban pynkiew dor hynrei na ka liang jong u u la iohi ba ka jingmang pisa kan nym kot ban pyndep ia katei ka iing, kan don ka jingkiew dor namar shisnem la sangeh ka jingtrei.
Ka jingpyntrei biang ia kane ka iing dorbar jong ka KHADC ia kaba la tip kum ka Legislative Wing la sdang biang ha dien ba kane ka Executive Committee jong u Bah PN Syiem ka la wan biang ha ka bor, kumba ka long mynta ka jingtrei kala dep kumba 50 Pc, ka pisa kaba ka EC kala ioh ban shna ia kane ka iing ka dang long tang T. 3 klur na kaba la mang.
Ka jingkwah jong ka EC ka long ba hapoh jong u bnai Nohprah jong u snem 2017 ka dei ban dep ka jaka shnong dorbar bad ka ophis jong u Chairman, ia kiwei kiba dangsah yn sa pyndep suki, wat la kata ruh lada lah ban ioh pisa ban pyndep ka EC kan pyndep iaka ha ka por ba la buh.
Ka jingdonkam pisa ban pyndep ia kane ka iing ka long sa kumba T.1.74 klur, ka jingduna pisa ka long b aka EC ha u snem mang tyngka 2011-2012 kala ioh tang shiklur bad n aka 13th Finance Commission ka dang ioh tang tang 2 klur, hynrei kane ka 13th FC kala kut noh bad kaba sah mynta ka EC kahap ban wat ki lad ki lynti, ym tang kattei hynrei ka EC kala iohi ba kan don ka jingkiew dor wat la u Bah D.G Marbaniang u ba pyntrei ia kane ka kam ym pat ong ei ei haduh mynta.
