Shillong, Iaiong 26: ka jingkhang ia ki 31 tylli ki jait dukan na ka bynta 8 sngi ha kane ka nongbah Shillong kumba la pynbna da ka sorkar ban iada na ka jingsaphriang u khniang jingpang COVID-19 kala sdang mynta ka sngi.
Na ka liang jong ka Hima Mylliem mynta ka sngi kala phah ia ki ar ngut ki myntri ba kin leit jurip ba pynthikna ba ki nongshong iew ha Iewduh kin kohnguh ia ka hukum jong ka sorkar bad ka juh ka por ba ki paidbah kin buh ia ki SOP ba la buh da ka sorkar.
Mynta ka sngi u Myntri Kharlukhi bad u Myntri Langstieh kila leit ban jurip ia ka iew ha ryngkat ki pulit jong ka hima ban peit bad ban pynsngewthuh ia ki paidbah ba kin bud ia ki jingbthah jong ka sorkar ha kaba ki shnong ha ki dukan bad kum juh ia ki nongwan iew ba kin deng ia ki jingda khmat.
Haba kren ha ki latpathai khubor ha dien ba la dep ka jingjurip u Myntri Langstieh u la ong ba kane ka jingwan jong ki ka long ban peit ba ki paidbah ki dei ban deng ia ki mask bad ha ka juh ka por ban kyntu ia ki nongshong iew ba kin ai Tika ban iada ia ki nongthied nongpet.
Ha kane ka jingwan jurip la lap ba bun kila bud ia ki jingbthah ka sorkar bad ha ka juh ka por ki don katto katne bi pynkhein ia ki kyndon bala bthah da ka sorkar, la bthah ia ki dukan ba baroh ba kin buh ia ki dawai kyllan kti ha man ki dukan.
Na ka liang jong u myntri Kharlukhi la ong ba na ka liang jong ka hima bad ka dorbar kala sngewdei ban wan jurip biang ba pynthikna ba ki paidbah kin bud ia ki kyndon namar bun na kiba wan iew kila klet iaki jingbthah ka sorkar bad bun ki paidbah kila bud ia ki kyndon.
Naka liang jong ka hima kan dang iai bteng ia kane ka jingjurip lada lap ba ki don kiba pynkhein ia ki kyndon ka hima kan leh ia kaba don kam, namar ka hima kam kwah ban iohi tang na ka daw jong ki katto katne ngut ki briew ka iew kan shah khang biang.
