Shillong, Kyllalyngkot 25: Ka Khasi Students’Union (KSU) lyngba ka jingiapynbeit jong ka NESO ban pynlong ki jingialang paidbah ha baroh ki jylla ka thain shatei lam mihngi ban pyni ia ka jingpyrshah ia ka Citizenship (Amendment) Bill 2016.
Halor kane la rai ban pynlong ia ka jingialang paidbah ha ka 30 tarik Kyllalyngkot 2019 ha Parking Lot jaiaw ha Motphran ha ka por 12 baje mynsngi. Ia kane ka la pynbeit katkum ka jingbthah jong ka NESO ha kaba la sakhi ruh ia ki jingiakhih paidbah ha kylleng ka thain shatei lam mihngi.
Kumta ka seng ka iawer ia baroh ki paradoh parasnam na kylleng ka Bri U Hynñiewtrep ban wan iashim bynta ha kane ka jingialang paidbah kum shi bynta ban pynsngew biang sha ka sorkar pdeng ba ki paidbah trai ri trai muluk ka jylla Meghalaya da kawei ka sur ha ryngkat bad baroh ki trai ri trai muluk ka thain shatei lam mihngi ba ngi pyrshah ia kane ka bill iakjakor kaba thmu ban pynkylla rit paid bad pynduh jait ia ki trai ri trai muluk ka jylla Meghalaya.
Ka KSU bad ka NESO ka iawer ruh ia ki paidbah ka ri lum Garo ba kin wan ia shim bynta lang ha kane ka jingialang paidbah namar ki nongialam ka Garo Students’Union ruh kin ia don bynta lang. Shuh shuh ka KSU ka khot sngewbha ruh ia ki sengbhalang kiba don shisha ka jingkitkhlieh ia ka khia ka shon jong ka jaidbynriew kum ka FKJGP, HNYF, RBYF, AJYWO, SSSS, KWWADA bad kiwei kiwei ban wan ia shim bynta shit rhem lem sha kane ka jingialang.
Ka seng ka iawer lut ruh ia baroh ki nongialam bad ki dkhot barim jong ka seng ban ia snoh kti lang hakatei ka jing ialang. Ha shwa ban pynlong ia kane ka public meeting kan don ruh ka jingiaiaid paidbah na ophis treikam ka seng na Jaiaw Chapel Road shaduh sha Parking ha Motphran bad ka seng ka iawer ia baroh ban ia don bynta lang ha kane ka jingiaiaid paidbah.
