Shillong, Naitung 11:Ka Joint Action Committee (JAC) jong ki saw tylli ki shnong, Nonghyllam, Umsur, Nongjri bad kulang kiba hap hapoh jong ka South West Khasi Hills District, kin pynlong ia ka jingiaid paidbah ha ka 14th Naitung 2017 ka sngi Thohdieng kada dei ruh ka sngi iew nongjri ban pyrshah ia ka jingshah rahbor jong u Bah Ricky Marwein ha ki Khar Bangladesh na ka shnong Umsur.
U Bah Nassar Marwein Chairman jong ka JAC, u la ong ba ia kane ka jingiaid paidbah kan sdang na Nonghyllam ha ka por 10.00 Baje mynstep bad kin pynkut ha shnong Nongjri kaba dei artad ka sngi iew ha katei ka sngi. Ha kane ka jingialang paidbah kin sa ia rai kumno ban leh na ka bynta ban wanrah ia ka jingshong suk shong sain ha kane ka thain.
Ka JAC ka kyntu ia ki riew rangbah bad ki paidbah ba kin ia poi khnang ha kane ka sngi ban ia shim bynta ha kane ka jingiaid paidbah, namat tang ha kine ki ar bnai kiba la leit ka jingshah rabor jong ki briew na katei ka thain ha ki briew na ka Ri Bangladesh kala jia la ar sien. Ia u Bah Ricky Marwein la rah bor ha ka 8th Naitung 2017 na iing sah jong u ha Umsur.
Dang ha ka 28th Iaiong 2017, ka KSU kala pynlong ia kane ka jingiaid paidbah ha katei ka thain ban pyrshah ia ka jingshah rahbor jong u samla Dajied Syiemlieh ia kaba la rahbor da ki khar Bangladesh ha kaba la ioh ban pynlait ia u da ki shipai jong ka Bangladesh Border Guard na khappud Meghalaya bad ka Ri Bangladesh.
