Shillong, Nohprah 29: Kum ka jingkynmaw burom ia ka lyngkhuh sngi iap ba 154th snem jong u nongialeh lait puid pyrshah ia ki phareng, u Kiang Nangbah ka Sein Raij Naimtre Shillong, mynta ka sngi kala pynlong ia ka jingai jingsumar ei ha iing seng jong ka kaba don ha Paltan Bazar.
Ha kane ka sngi da ki spah ngut ki paidbah na kylleng kane ka sor shillong ki la leit ban phah eksamin ia lade ha ki doctor bapher bapher kiba don ha kane ka sngi, kum ki dkotor khmat, bniat, shyiang bad kiba ia dei bad ki jaid jingpang ba ha rukom.
Ha kane ka sngi ym tang ba la eksamin ei ia kiba leit ban phah eksamin hynrei la ai ruh ia ki dawai na ka bynta jong kito ki briew kiba don ia ki jingpang ki bapher bapher katkum ka jingshem jong ki doctor. Ka sngi iap jong u Kiang Nangbah ka dei la shai ka sngi ha kaba ka jylla ruh kala rakhe pyndon burom ia kane ka sngi da kaba ai shuti.
U Kiang Nangbah u dei u wei na ki nongialeh pyrshah ia ka jingsynshar don bor jong ki phareng bad ha kane ka jingialeh ki phareng kila ioh ban kem ia u bad pynrem ia kane ka jingleh jong u da kaba sdien phasi ia u ha Iew Musiang ha Jowai. Kum ka jylla ka rakhe burom ia kane ka sngi ban kynmaw ia u kum u wei na ki ningialeh laitluid jong ka Ri.
