Shillong, Lber 10: U symbut myntri rangbah ka jylla u bah Prestone Tynsong haba jubab ia ka jingkylli kaba la wanrah da u bah Himlaya M Shangpliang ha kaba ia dei bad ka jingkieng ha wah Khasimara, u myntri la ong ba ka sorkar kala phah ia ka jingthoh sha ka NABARD ban pan pisa ban sha ia kane ka jingkieng.
U bah Prestone la iathuh ba kane ka jingkieng ka jrong 120 meter bad ka sorkar kala pan pisa T.24/- klur bad mynta ka sorkar ka dang ap ban ioh ia ka pisa na ka NABARD lyngba ka skhim na ka liang ka sorkar ka don ka jingkymren ba kin ioh ia kane ka pisa mynta u bnai.
Ha kawei pat ka jingkylli ha kaba ia dei bad ka surok PMGSY ha Mendipathar kaba la kylli da u Marthon Sangma, u symbut myntri rangbah ka jylla la ong ba ki don ar tylli kiba PWD kala weng noh ia ki kontraktor na ka daw ba kim pyndep shuh ia ki jingtrei bad ka sorkar kala khot tender biang ban pyntrei ia ki.
